Belgurinn

2004-04-16T06:35:00.000-07:00

Ég verð að skella þessu inn. Þetta var á Kistunni.is:

Jess misster Pressident

Halló. Ha? Hver? Ó! Iss itt jú?. Vott a lovlí surpræs, misster pressident. Æ voss nott expektíng jú tú koll. Jess misster pressident, æ am verrí gladd tú hér fromm jú. Jess. Jess. Jess misster pressident. Jess. Æ agrí, misster pressident. Ví æsslanders verr viþ jú vonn hönndred prósent in ðe Íran vor. Jess. Nó, æ mín ðe Írak vor. Jess. Jú ar verrí velkom. Jess. Ví hav bín frends viþ jor neisjon for a verrí long tæm. Jess, bött ví vont tú havv ðe arrmí still inn Æsland, ví ar verrí vorríd ðat jú vill teik ðe arrmí avei fromm öss. Jess. Nónó. Nó, ðat is djöst sömm sillí ædea off the minnister off djöstiss. Itt is djöst hiss hobbí. Hiss hobbí, jess. Jess, ví vont tú kontinjú tú hav ðe amerríkan armí in Keflavík. Tú fæt for ðe dímókrosí, jess. Jess misster pressident, ví ar olsó nott afreid off ðe terrosists and viss tú sjóv ðem ver Deivíd bott ðe bíer. Jess. Nó, Deivíd. Jess. Bíer. Nó, nott mí, öððer Deivíd. Jess. It iss an óld æslandikk seying. Ðe Íraks, jess. Ví ver verrí gladd ðat jú sjóvd ðem ver Deivíd... æ mín ðat jú libbereited ðe neisjon. It iss djöst læk venn jú seivd ðe frents fromm Hittler. Jess. Ó, dónt vorrí, misster pressident, jú vill fænd ðis Bin Laden gæ verrí sún. Jess. And jú vill olsó fænd ðe sinnep gass. Jess. No. Jess. Vell, þank jú verrí möts. It vos næs tú hér fromm jú. Giv mæ rígards tú ðe först væf. Jess. Ðe först leidí, jess. Ókei Misster pressident. Hav a næs dei.

Vitiði hver var að hringja?

-Grænhöfði

2004-04-13T11:49:00.000-07:00

Kæru Íslendingar og aðrir jarðarbúar.
Þið eruð yndislegir. Þið eruð lágvaxnir, slánar, innskeifir, útskeifir, hjólbeinóttir, silalegir og tignarlegir. Þið eruð úfnir, vel greiddir, sköllóttir, með bauga undir augum, vel úthvíldir og geislandi af heilbrigði, ósmekklegir í klæðaburði eða fórnarlömb tískunnar. Margir eruð þið með sigin brjóst, lítil brjóst eða engin brjóst, sum þeirra eru stinn í nýjum brjóstahöldurum, önnur ekki í brjóstahöldurum. Þið eruð með björgunarhring – eða hringi, sumir þó með grjóthart þvottabretti. Sumir eru ljótir, samkvæmt ríkjandi fegurðarmati, en þó eru hér margir svanir.
Svanurinn er fallegur fugl. Hann er skjannahvítur með langan háls og stóra vængi. Svanurinn er líka grimmur og skapstyggur fugl sem á það til að ráðast á varnarlausar endur og stela af þeim brauði. Svanurinn nær lengra, hann hefur betra útsýni og er miklu stærri en önd sem gerir það að verkum að hann þarf meira brauð en litlar og ljótar endur. Það er gott að vera svanur.
Litlar, ljótar, skítugar og fjaðurreittar endur dreymir margar um að breytast í svan. Þær láta laga á sér gogginn, minnka í sér brauðmagann og lengja hálsinn. Þær synda til svananna og biðja þá um að hjálpa sér, leiðbeina sér í breytingaferlinu. Svanirnir eru fúsir til þess, fái þeir risastóran brauðhleif að launum.Síðan hefst þrotlaus þjálfun og sársaukafullar skurðaðgerðir þar til svanurinn stígur glæstur út úr eggi sínu. Litlu ljótu endurnar, sem breyst hafa í svani, streyma síðan upp á bakkann og sýna hinum ljótu öndunum hvað þær eru flottir svanir. Æðislegustu og smörtustu svanirnir velja síðan eina, umbreytta önd og krýna hana Fallegasta svaninnn. Svanirnir fljúga síðan hamingjusamir í oddaflugi á vit ævintýranna. Steggirnir sitja eftir í tjörninni, skítugir og ljótir, og gráta yfir því að allar ljótu endurnar séu farnar. Þeir óska þess að hinir nýumbreyttu svanir éti yfir sig af brauði og springi í loft upp.

Þið getið skoðað þetta ævintýri myndskreytt á Netinu. Slóðin er:
http://fox.com/swan/home.htm

Takk fyrir.

2004-04-09T14:10:00.000-07:00

Helgapabbinn snýr aftur. Börn hafa þann ótrúlega hæfileika að leika sér með mjög einfalda hluti í margar klukkustundir. Til dæmis Bionicle-karla, svona legodót sem er vélmennageimverur eða eitthvað þannig. Máni lék sér með tvo slíka í ca. 2 klst. í gær og nálægt 3 klst. í dag. Gæti fullorðin manneskja gert það? Ég leyfi mér að efast. Pæling fyrir sjónvarpsþátt í staðinn fyrir Ædolið, láta fólk byggja bioniclekarla og leika sér síðan með þá og sá sem endist lengst vinnur. Sé það fyrir mér ,,minn ætlar að lemja þinn, æ nei nú kemur þinns og lemur minns Óóóó" o.s.frv. Miklu skemmtilegra en laglaust, ófrumlegt fólk.
Annars fórum við feðgar í fótbolta í dag eða ÉG fór í fótbolta og Máni fór að renna sér í rennibraut. Skrítni helgapabbinn æfði sig í að halda bolta á lofti á leikvelli í nálægt klukkustund. Talandi um að leika sér með einfalda hluti. Ég er nú ekki mikill fótboltasnillingur eins og flestir vita, meira svona karatefótbolti eða eitthvað þannig hjá mér. Ég er aðallega góður í því að rjúka á menn og sparka í lappirnar á þeim, ekki mikill sóknarmaður enda var ég nú yfirleitt að gera eitthvað annað þegar önnur börn voru í fótbolta. Inni að borða súkkulaðibúðing til dæmis, litla feitabollan. Held það sé ágætt að vissu leyti að hafa verið feitt barn, þá hefur maður víti til að verjast og fær að kynnast ákveðinni niðurlægingu sem önnur börn fá ekki að kynnast. Mjög praktískt sem sagt.
Við Ólöf fórum á Dawn of the Dead í fyrradag. Dálítið svipuð 28 days later auðvitað, hvort tveggja svona lifandi dauðir stemning. Mér finnst þessa breska nú betri, meiri karakterar í henni og frumlegri saga. Það er auðvitað erfitt að tala um frumleika í svona myndum en þessi Dawn of ... er nú ansi flott og byrjunin og endirinn mjög frumleg. Það er óvenjulegt að fara á mynd þar sem byrjun og endir eru bestu partar hennar. Og kreditgrafíkin mjöög flott með Johny Cash undir, The Man comes around held ég að það heiti. Er að horfa á þetta helv.. American Idol. Hvernig nennir fólk að horfa á þetta helvíti? Svo er fólk að skammast yfir því að myndlist sé leiðinleg! Svo er þetta algjörlega endalaust drasl. Sá algjöra hörmung. Í Sky fréttatíma var verið að tala um nýja keppni í sjónvarpi sem heitir The Swan. Þar keppa dálítið búttaðar og frekar ófríðar dömur sín á milli í að verða sætar með hjálp lýtalækna og einkaþjálfara. Að lokinni breytingu verður síðan haldin fegurðarsamkeppni þar sem ein þeirra er valin sætust!! Þvílíkt rugl og asnaskapur. Það á að banna þetta.
Þeir sem ekki trúa kíkið á það hér hér er síðan hjá sjónvarpsstöðinni

2004-04-06T03:49:00.000-07:00

Níels rassmus Ísfeld fór enn einu sinni til dýralæknis í gær. Í þetta sinn var hann með sár á afturfæti og var á góðri leið með að sleikja fótinn af sér. Hann var alveg óður í bílnum á leiðinni til Dagfinns dýralæknis og gjörsamlega snar þegar dýralæknirinn fór að taka á honum. Dýralæknanemi hélt honum niðri en þó tókst Níelsi að klóra hann ca. 20 sm. löngum skurði á handlegg. Merkilegt að dýralæknar séu ekki í brynhönskum. Þetta var algjör niðurlæging fyrir greyið. Það var troðið pillu ofan í kok á honum, tennurnar skrapaðar allharkalega og tveimur risastórum sprautum stungið í bakið á honum. Þá var fóturinn vafinn og skermur settur á hausinn. Þetta var svo mikil raun að hann missti helminginn af feldinum á borðið hjá lækninum. Þegar heim var komið reyndi hann heillengi að bakka út úr skerminum og hristi fótinn stanslaust. Það var mjög fyndið að sjá það, maður hló eins og skepna en sagði samt æjæjæj..... Ég tróð sýklalyfi í kokið á honum í morgun og tókst bara vel, kannski hefði ég orðið góður dýralæknir?

2004-04-05T16:21:00.000-07:00

Æran er talin fela í sér tvo meginþætti, sjálfsvirðingu manns sem kölluð er huglæg æra og virðingu/álit annarra manna sem er þá hlutlæg æra. Þessa meginþætti má síðan yfirfæra í umfjöllun laganna um móðganir og aðdróttanir.

Móðgun getur bæði beinst gegn sjálfsvirðingu manns og haft áhrif á skoðanir annarra manna á hinum móðgaða. Aðdróttun er fólgin í ásökun á hendur öðrum sem getur orðið virðingu hans til hnekkis. Talað er um það að auðveldara sé að sanna efni aðdróttana heldur en móðgana, í rökfræðilegri sem og lögfræðilegri merkingu. Af öllu virðist sem aðdróttun verði að berast út til fjölda manna til þess að geta talist alvarleg og virðingu til hnekkis. Lögin fjalla oftar um aðdróttanir en móðganir sem hlýtur að leiða mann að þeirri ályktun að móðgun sé óæskilegra hugtak þar sem erfiðara er að bera kennsl á hana sem slíka. Aðdróttanir eru líka vel skilgreindar í lögum en móðganir ekki, málinu til stuðnings. 234. gr. hgl. segir að „hver, sem meiðir æru annars manns með móðgun í orðum eða athöfnum, og hver, sem ber slíka aðdróttun út, þá varðar það sektum eða fangelsi allt að 1 ári“. Þar er í raun sagt að móðgun sé aðdróttun en ekki beint skilgreint hvers konar aðdróttun. Almennt talið að móðgun feli í sér vægari meingerð en aðdróttun.
Aðdróttanir eru hið grófara stig ærumeiðinga skv. túlkun Páls. Talið er að 235. gr. hgl. tæmi sökina, að einungis sé refsað eftir því ákvæði., refsiramminn er sá sami fyrir ,,einfalda aðdróttun“ og móðgun. Fyrrnefnd grein segir að „ef maður dróttar að öðrum manni einhverju því, sem verða myndi virðingu hans til hnekkis, eða ber slíka aðdróttun út, þá varðar það sektum eða fangelsi allt að einu ári“. 236. gr. hgl. fjallar síðan frekar um ærumeiðandi aðdróttun út frá því hvort hún sé „borin út gegn betri vitund“. Það er harðar tekið á „auknum“ aðdróttunum en „einföldum“ og það er tekið jafnhart á útbreiðslu ærumeiðinga eins og ærumeiðingunni sjálfri. Þá kemur upp spurningin varðandi það hvort frásögn er ekki vítalaus ef almenningur þekkir hina æruðmeiðandi frásögn þá þegar. Í máli Þorgeirs Þorgeirssonar varð það honum til málsbóta að hann byggði að miklu leyti á frásögnum annarra. Mannréttindadómstóll Evrópu virðist hafa litið svo á að Þorgeir bæri ekki ábyrgð á útbreiðslu ummælanna því þau voru höfð eftir öðrum. Ærumeiðing virðist enn fremur byggjast á því að einhver taki við skilaboðunum eða meiðingunum og meiðandinn verður að hafa komið þeim áleiðis með vitund og vilja (skv. Gunnari Thoroddsen) Briglsyrði skv. 237. gr. hgl. geta falið í sér ásakanir sem kunna að vera aðdróttanir. Þannig er sú grein að vernda sjálfsvirðingu hins brigslaða.

Þó talað sé um móðgun þá virðist aðdróttun mun sterkari, sá hluti sem veit meira að virðingu manns gagnvart öðrum, bæði túlkunarlega sem lagalega. Aðdróttun er meira „út á við“ en móðgun frekar„inn á við“. Varla er hægt að fara í meiðyrðamál við einhvern ef aðeins einn annar heyrði til og ómögulegt ef enginn heyrði til. Sjálfsvirðing verður líka að vera aðskilin frá virðingu eða áliti annarra manna. Þannig geta menn talið vegið að sjálfsvirðingu sinni en enginn annar talið það þó. Listgagnrýni gæti talist á mörkum þessara tveggja hugtaka og oft erfitt að greina á milli. Listamaður gæti kært rýninn fyrir það að vega að sjálfsvirðingu sinni með því að draga úr áliti annarra á sér. Hann gæti gefið sér það að sjálfsvirðingin hafi boðið hnekki án þess að geta sannað það að álit annarra á honum hafi minnkað! Hann drægi þá ályktun út frá eigin viðbrögðum og túlkun á orðum gagnrýnandans.
Hvernig verður það með Laxnessbók Hannesar Hólmsteins? Ef niðurstaða dómsmálsins, sem ættingjar Halldórs Laxness hyggjast takast á hendur, verður Hannesi í vil gæti Hannes þá farið í ærumeiðingarmál í framhaldi af því? Sakað þau um „aukna aðdróttun“ þar sem mannorð hans hafi beðið hnekki í augum almennings? Hann gæti borið fyrir sig ákvæði í 239. gr. hgl. og „goldið líku líkt“ eins og þar stendur, sem í raun þýðir að menn megi hefna sín fyrir ummæli annars, tönn fyrir tönn svo að segja. Það er nú ekki sannkristið ákvæði. Ekki eru þó allir menn jafnir fyrir lögum þegar kemur að ærumeiðingum. Hannes er orðinn það opinber persóna og skotspónn almennings að slíkt væri hæpið. Mannréttindadómstóll Evrópu virðist þess sinnis, a.m.k. þegar stjórnmálaumræðu ber á góma. En í 12. gr. mannréttindayfirlýsingar Sameinuðu þjóðanna segir að ekki megi vanvirða eða spilla mannorði nokkurs manns eftir geðþótta og í 17. gr. sáttmála S.þ. um borgaraleg og stjórnmálaleg réttindi er sagt að enginn skuli þurfa að þola ólögmætar árásir á heiður eða mannorð sitt. Í fyrra tilfellinu má því túlka sem svo að átt sé við virðing/álit annarra og í því síðara sjálfsvirðingu að mati Páls. Þjóðarréttur virðist vernda sjálfsvirðingu manna. Mannréttindasáttmáli Evrópu, sem Íslendingar hafa veitt lagagildi, virðist hins vegar ekki verja hina huglægu æru eða sjálfsvirðingu þar sem einungis er minnst á mannorð sem hlýtur að teljast hlutlægt. En það leiðir talið að stjórnarskránni okkar.

Í 73. gr. stj.skr. segir: ,,Tjáningarfrelsi má aðeins setja skorður með lögum í þágu allsherjarreglu eða öryggis ríkisins, til verndar heilsu eða siðgæði manna eða vegna réttinda eða mannorðs annarra, enda teljist þær nauðsynlegar og samrýmist lýðræðishefðum.“ Mannorð er þar nefnt en ekki heiður. Má því segja að sjálfsvirðingin sem slík, hin huglæga æra, sé ekki varin í stjórnarskrá og mannréttindasáttmála Evrópu.
Móðgun sem ekki felur í sér aðdróttun beinist fyrst og fremst gegn sjálfsvirðingunni. Páll spyr því hvort ekki megi líta svo á að 234. gr. hgl. um móðganir hafi lítið vægi fyrst ekki er minnst á slíkt í þeim lögum sem eru æðri hegningarlögum. Hann telur líklegt að þetta vafaatriði geti leitt til þess að refsingar við einföldum móðgunum verði brot á tjáningarfrelsi þar sem það ákvæði stjórnarskrár og mannréttindasáttmálans vegi þyngra.

Huglægi þátturinn, sjálfsvirðingin, hefur því klárlega ekki sömu lagalegu verndina og hinn hlutlægi. Það hlýtur að teljast rökrétt í ljósi þess hvers eðlis hugtökin eru og líklegt að það byði upp á misnotkun ef einfaldar móðganir hefðu meira vægi fyrir lögum og hætta á að tjáningarfrelsinu og fjölmiðlum yrðu settar lagalegar skorður. Ég get ekki betur séð en að það sé réttlætanlegt að hin huglæga æra njóti minni réttar. Það er eiginlega spurning hvort ekki eigi hreinlega að fjarlægja allt tal um „móðgun“ úr hegningarlögunum þar sem það er afar veikt hugtak og illa skilgreint. Ærumeiðing gefur það til kynna að manneskja hafi hlotið þó nokkurn skaða sem persóna með einhverjum hætti. Það segir í raun allt sem segja þarf að talað sé um ,,huglæga” æru. Það sem er huglægt hlýtur að vera allt of afstætt til þess að dómstólar geti metið það af fullkomnum heiðarleika. Sem dæmi má taka að stjórnmálamaður kalli þekktan mann úr viðskiptalífinu „götustrák“ eða „mafíósa“. Ef þau ummæli færu fram á krá þannig að fáir heyrðu til myndi fólk líklega kalla það móðgun. En ef stjórnmálamaðurinn segir þetta í ræðustóli á Alþingi eða í sjónvarpsþætti þá eru þetta meiðyrði og aðdróttanir, miklu meira en móðgun og gæti jafnvel valdið þeim sem fyrir ummælunum verður fjárhagslegum skaða. Það liggur jú í augum uppi að slíkt væri ekki móðgun lengur heldur miklu stærra en það. Ég tel það því af og frá að slíkir þættir nytu sömu verndar fyrir lögum.

2004-04-05T14:17:00.000-07:00

Væri einhver annar en kærastan mín til í að kommenta einu sinni?

2004-03-30T16:41:00.000-08:00

Ég fór með Mána á bíó um helgina. Við horfðum á Pétur Pan. Mér finnst þessi saga svona ágæt út af fyrir sig en sé alls kyns fýsnir og hneigðir fullorðinna út úr sögunni. Það hafa nokkur „syndrome“ verið búin til upp úr henni, „peter pan syndrome” um karla sem vilja ekki verða fullorðnir (Michael Jackson og Never never land búgarðurinn hans) og konur sem eru undirgefnar karlinum er Wendy dilemma eða eitthvað svoleiðis. Pan var náttúrulega spólgraður skógarpúki í goðafræðinni sem rak upp mikil öskur í kynæsingi sínum sem fyllti kvenverurnar ótta eða Panic. Hann er ósigrandi, fljúgandi drengur að breytast í mann og berst við gamlan og ljótan sjóræningja. Það er mikið klifað á því að Kobbi krókur sé gamall í myndinni. Ég áttaði mig á því að Lost Boys, blóðsugumyndin gamla, er skírð eftir strákunum í Pétri Pan sem hafa yfirgefið fjölskyldur sínar og búa með Pétri í draumalandi. Það er óhuggulegt að hugsa til hugsanlegrar barnahneigðar Michael Jackson og hrifningar hans af þessari sögu. Getur þó verið sakleysislegt.

Það er óskapleg væmni í myndinni en það er líka dálítið skemmtilegt að pabbinn í sögunni er líka Kobbi krókur. Var pabbi höfundarins einhvers konar flagð undir fögru skinni? Lamdi hann fjölskylduna en var engill þess á milli? Það er mjög skrítinn stemning í kringum mömmuna í myndinni, hún líður um í einhverju móki síbrosandi. Höfundurinn, James Barry, var víst hálfgerður dvergur sem átti við einhverja móðurkomplexa að glíma. Hann hætti að vaxa snemma á unglingsárum og sumir vilja tengja það við Pétur Pan. Wendy dilemma er ákveðið sálfræðifyrirbæri sem eignað er konum sem hafa hagað sér eins og mæður eiginmanna sinna en vilja hætta því. Eitthvað í þá átt. Pétur Pan vill nefnilega að Wendy verði mamma þeirra allra en verður ástfanginn af henni. Síðan er lítil fljúgandi skógardís ástfangin af Pétri og gríðarlega afbrýðisöm út í Wendy. Meiri vitleysan og sjálfsagt allt oftúlkun.
En myndin sjálf er mjög flott, rosa vel gerð og leikararnir góðir. Tinkerbell er voða flott líka....

2004-03-30T15:20:00.000-08:00

Ungur maður réðst á Björn Bjarnason, dómsmálaráðherra í Laugardalslaug í dag sem olli vægu hjartaáfalli hjá Birni og var hann fluttur í skyndi á sjúkrahús. Að sögn lækna heilsast Birni vel en árásarmaðurinn er í haldi lögreglu.

Að sögn vitna var Björn að slaka á í heitapotti númer 4 í Laugardalslaug eftir daglegan sundsprett þegar ungur maður kom hlaupandi ofan í pottinn og greip dómsmálaráðherrann kverkataki. Tveir menn á sjötugsaldri voru staddir í pottinum og áttuðu sig á því hvað væri á seyði og komu Birni til hjálpar. Tókst öðrum þeirra að losa kverkatakið með því að slá árásarmanninn utan undir og tók hann þá á rás og stökk yfir grindverk sem skilur laugina og tjaldstæði ferðamanna að. Dómsmálaráðherra steig upp úr pottinum en hneig skömmu síðar niður fyrir framan eimbað laugarinnar og komu sundlaugarverðir honum til hjálpar og hringt var á sjúkrabíl. Reyndist Björn hafa fengið vægt hjartaáfall en læknar segja líkamlegt ástand hans gott og að eðlilegt sé að menn verði fyrir áfalli við slíkan atburð.
Lögreglan hóf þegar leit að árásarmanninum og náði honum um hálftíma eftir atburðinn á hlaupum í lystigarði Laugardals á rauðri Speedo sundskýlu einni fata. Að sögn lögreglu var sakborningurinn færður í klæði og yfirheyrður en mennirnir tveir úr heita pottinum báru kennsl á manninn. Lögreglan segir lítið samhengi hafa verið í máli mannsins við yfirheyrslur og er hann nú til rannsóknar hjá geðlækni. Húsleit var gerð á heimili mannsins og fundust þar ógrynni útprenta af heimasíðu dómsmálaráðherra og úrklippur úr dagblöðum með greinum eftir Björn og stór andlitsmynd á vegg sem í stóðu pílukastspílur. Lítið altari fannst í íbúðinni þar sem kerti höfðu brunnið og leirdúkka lá á því með álímdri andlitsmynd dómsmálaráðherra og hafði tugum títiprjóna verið stungið í hana. Telur lögreglan að árásarmaðurinn hafi verið heltekinn af persónu dómsmálaráðherra og að árásin hafi verið vandlega undirbúin. Einnig fundust nokkrar rörsprengjur merktar Birni og teikningar af húsinu hans.
Lögreglan vildi ekki gefa upp nafn sakbornings en Dagblaðið Vísir komst á snoðir um það og birti nafn og mynd af manninum í dagblaði dagsins. Árásarmaðurinn er 25 ára gamall háskólanemi að nafni Sölvi Tryggvason og býr hann í nágrenni við Laugardalslaug. Fréttastofan náði tali af bekkjarfélaga Sölva í hagnýtri fjölmiðlun sem vill ekki láta nafns síns getið en segir Sölva dagfarsprúðan og dreng góðan. Bekkjarfélagar hans hafi þó tekið eftir ákveðinni þráhyggju varðandi dómsmálaráðherra sem hafi ágerst seinustu daga og hafi þeir óttast að svona myndi fara eftir að Sölvi flutti þeim öfgafullan pistil þar sem hann gagnrýndi Björn harðlega fyrir skoðanir sínar. Ekki náðist í dómsmálaráðherra í dag vegna atburðarins en heimildir fréttastofu herma að hyggist leggja frumvarp fyrir Alþingi þess efnis að stofnuð verði sérstök sundlaugasérsveit fyrir höfuðborgarsvæðið.

2004-03-24T02:24:00.000-08:00

Hafið þið, kæru lesendur, lent í hinu svo kallaða lögmáli Murphy? Ég þekki sögu þessa ágæta Murphy en lögmálið gengur út á það að lengi geti vont versnað, að eitt slæmt leiði til annars. Megas benti þó á það að böl mætti bæta að benda á eitthvað annað. Það er gott að hafa hugfast þegar maður lendir í þvottavélarglímu.
Sagan hefst á því að fyrir nokkrum dögum er ég að sinna húsverkum eins og metrósexúal manni sæmir. Sem ég beygi mig niður að þvottavélaropinu til þess að sækja þvottinn í trommuna þá verður mér það á í hugsunarleysi að styðja mig við hurðina á vélinni. Ég studdi mig nú ekkert mikið við hana en þó brotnaði lömin öðru megin. Ég tók því nú bara furðuvel þar sem ég var of syfjaður til þess að æsa mig yfir því. Okkur tókst að þvo þvott þrátt fyrir lamarlömunina, hurðin hélst föst við opið.
Í gær ákveð ég að hringja í Raftækjaverslun Íslands og athuga hvort til sé slík löm. Kerling þar glaðleg segir að hún sé ekki til stök en hún geti látið mig hafa hurð og löm á 3 þús. kall í stað þess að bíða eftir löm sem kostar 1900. Mér finnst það ágætis díll og bið hana að taka frá draslið. NB!! Ég var búinn að segja henni hvaða tegund þetta væri, Creda Advance 1000!! Ég bið miðaldra móður mína að gera mér þann greiða að sækja draslið. Hún gerir það auðvitað af því hún er svo góð lítil mömmukerling. Hurðin lítur nú ekki eins út og hin en lömin þannig að hún virðist smella. Ég geri þau mistök að treysta því að þetta hafi verið rétt hjá hel..... konunni í búðinni. Kemst að því að ekki er hægt að fjarlægja skemmdu lömina án þess að stykki innan í vélinni losni. Það losnar og ég þarf að taka allt draslið úr sambandi og leggja vélina á bakið samkvæmt tilmælum verskstæðisstarfsmanns Raftækjaverslunar Helvítis. Tekst að finna stykkið aftur. Tekur þá við glíma að skipta um löm á hurðinni. Kemst að því að nýja hurðin passar ekkert þó svo löm sé á og framlenging. Skrúfa hurðina í sundur, tek löm úr, set á gömlu hurðina, loka henni, skrúfa báðar hurðir saman aftur. Kemst þá að því að gamla hurðin passar ekki heldur með þessari löm. Æ já ég gleymdi því að karlinn í R.H. (Raftækjaverslun Helvítis) sagði að ég þyrfti bara að taka sápuboxið úr vélinni og þá kæmist ég að staðnum sem lömin ætti að skrúfast í. Það var auðvitað rangt. Sem sé mikill tími farinn í tilgangsleysi, allt rennandi blautt á gólfinu og ég eins og eldfjall í miðju gosi. Þeir sem þekkja mig vel vita að ég er ekki þolinmóðasti maður í heimi og svona hlutir gera mig brjálaðan. Ólöf passaði sig því að hjálpa mér ekki þar sem hún veit að Herra Hyde kemur fram við slíkar aðstæður. Hann kom seinast fram af fullum krafti þegar ég setti saman útigrillið. Það er eitthvað mesta helvíti sem ég hef lent í. Veit fólk að það eru ábyggilega 300 skrúfur í einu sakleysilegu útigrilli? Í miðju brjálæðiskasti yfir þvottavélinni hringir svo 'Islensk grafík í mig og minnir mig á 30 þúsund króna skuld sem ég þurfi að borga. Takk kærlega.
Dagurinn í dag byrjaði hins vegar vel þar sem Ólöfu tókst að fá miða á Pixies. Litli krúttið fór í útigallann sinn og trítlaði upp í Skífu með vinkonu sinni og beið þar í tvo tíma í kuldanum á meðan ég svaf heima. Hehehehe. Debaser!! This monkey´s gone to heaven!
Gerið mér nú greiða og skrifiði mér ykkar reynslu af lögmáli Murphys hér í kommentapokann fyrir neðan.

2004-03-19T13:17:00.000-08:00

Komið þið sæl.
Seinustu dagar hafa verið undarlegir. Mér finnst eins og ég hafi lent í tímasugu. Hver dagurinn líður á fætur öðrum án þess að maður komi nokkru í verk að mér finnst. Ég er með haug af teikningum á bakinu sem virðist ekkert minnka. Fimmtudagar í skólanum eru ferlegir, 8- 15 og stór hluti þess tíma fer bara í vitleysu. Það er bara svo óþægilegt að geta stjórnað því í hvað tíminn fer. Maður frestar í sífellu því leiðinlegasta. Þumalputtareglan er að gera allt á seinustu stundu. Dagurinn í gær til dæmis fór að mestu leyti í skólann og þegar ég hefði síðan átt að fara heim að vinna þá ákveð ég að fara í sund með Jóni Gunnari og eyði rúmum klukkutíma í það! Síðan borðaði ég og fór beint á pressukvöldið okkar hagnýtra þar sem fjallað var um nafn- og myndbirtingar.
Ég er líka í smá innri glímu. Mig langar bara að klára þetta nám og fara að vinna. Ég nenni þessu ekki lengur, veit ekki hvað er að gerast með mig. Þar að auki virðist ég hafa smitast af karate-leiða Ólafar spaða því ég skrópa á æfingar hvað eftir annað. Hef sennilega æft einu sinni í viku núna í tvo mánuði sem er mjög slæmt. Karatesuga! Við Ólöf erum líka dugleg að letja hvert annað. Annars er þetta klassískt vandamál að tolla illa við það sem maður er að gera. Ég verð oftast nær fljótt leiður á því sem ég er að gera hverju sinni, ég er þessi ráfandi og villta týpa býst ég við. En mikið er þetta nú upplífgandi blogg! Ég hlakka mikið til sumarsins, smá smjörþefur af sólskini undanfarið hefur espað það upp í manni. Langar bara að hanga í sundlaugum og drekka bjór við grillið. Fara í útilegur og sumarbústaði, koma út af skemmtistöðum í dagsbirtu og fá mér vöfflu í morgunmat. Mmmmm.......

2004-03-09T16:00:00.000-08:00

Komið sæl.
Til að útskýra gyðjuna þá er ég að taka þátt í kynóraleik Spaðans . Ég var sjónvarpsfréttamaður í dag. Starfskynning hjá Sjónvarpinu, RÚV. Ég held ég geti fullyrt að ég verð aldrei sjónvarpsfréttamaður. Það er alveg dagsatt að maður fitnar um 20 kg. við það að birtast í sjónvarpi. Ég var eins og fertugur, feitur karl. Hitti Ólaf Sigurðsson sem er jú ansi feitur en mjög fyndinn karl. Hann varaði okkur við því að vinna hjá Sjónvarpinu, það væri illa borgað og allt ómögulegt við það. Það væri skelfilegt ástand á fjölmiðlum. Byrjunarlaun væru eins og maður fær á kassa í Bónus. Svo væri vinnutíminn skelfing. Það er nú reyndar rétt, mætt tæplega 9 og farið heim tólf tímum seinna. Það er samt vaktakerfi.
Við Sölvi vorum hvor með sína fréttina, fórum og tókum viðtöl og "stand up" sem var alveg ferlega asnalegt. Trúið mér að það er margfalt flóknara en það virðist að gera sjónvarpsfrétt. Það er svo margt sem þarf að hafa í huga í klippingu, myndefnisvali, orðalagi og blablabla. Finna nákvæmar tímasetningar á öllu o.s.frv. Útvarp er eiginlega dásamlegt í samanburðinum. Það tók mig óratíma að gera það sem tekur fólkið sem vinnur þarna u.þ.b. klukkustund. Ég á meira að segja eftir að klippa og lesa inn á. Ég held ég geti slegið því föstu að ég vil ekki vinna við þetta þó svo gott hafi verið að prófa þetta.
Það var mjög mikið að gera þarna út af strandinu við Vík og því gátum við falið okkur nokkurn veginn við tölvurnar og sluppum við frekari fréttaskrif. Það er samt mjög almennilegt fólk þarna, Elín Hirst er mjög fín og Bogi og allir hinir. Við fylgdumst með útsendingu kvöldfrétta. Það var eins og verið væri að skjóta geimflaug á loft, allir talandi í belg og biðu og Logi Bergmann hlustaði á allar raddirnar en las samt fréttir. Allir að springa úr stressi hvort Ómar kæmist í loftið. Þannig að bak við kúl yfirborð fréttaþula býr algjört öngþveiti. Mjög skemmtilegt að horfa á það. Pottþétt leið til þess að fá magasár að vera útsendingarstjóri fréttanna.

2004-03-08T09:03:00.000-08:00

2004-03-07T08:08:00.000-08:00

Þynnkuþreyta
Ég geld þess nú að hafa drukkið mikið magn af bjór í gær. Guðni hagnýti kom í heimsókn og við sporðrenndum bjórkippum eins og við fengjum borgað fyrir það og bulluðum um allt mögulegt. Vorum í sms-sambandi við Sölva og Jón Pétur en sá síðarnefndi kom með Gerði kærustu sinni um miðnætti eða svo og við sumbluðum aðeins meir. Héldum þá á Hverfisbarinn og dilluðum bossum og drukkum enn meira af bjór. Ég held að það ætti að endurskíra Hverfisbarinn og hafa það Smápíkubarinn. Ég held að þessi staður væri farinn á hausinn ef litlar stelpur úr menntaskóla fylltu hann ekki um helgar. Sumar virtust jafnvel vera á gagnfræðaaldri.
Sem við erum að dansa fæ ég allþétt högg í bakið. Ekkert vont eða neitt þannig en svona dæmigert högg frá vini sem er drukkinn og maður hefur ekki séð lengi. Nema hvað að þar stendur ungur maður með snoðhaus í blárri forstjóraskyrtu. Ég horfi undrandi á hann og þá hrópar hann "I´m an American!" og lyftir upp höndum eins og hann hafi sigrað hnefaleikakeppni. Ég segi undrandi við hann að það sé nú gott að heyra og hann svarar að mig minnir "Let´s pump up the girls, man!" og bendir með höfuðhnykk á stelpustóð dansandi í nágrenni við okkur. Mig minnir að ég hafi hvatt hann til dáða og snúið mér aftur að mínum félögum. Það seinasta sem ég sá til hans var að hann var að nudda sér utan í litla stelpu sem líkaði það ekki vel. Ætti maður kannski að gera þetta þegar maður er að skemmta sér erlendis, berja einhvern í bakið og hrópa fagnandi að maður sé Íslendingur? Hugmynd.
Við Ólöf fórum í hádeginu á Kaffibrennsluna og fengum okkur lítinn "brunch": egg, beikon, sveppi, kartöfluteninga, ristað brauð, appelsín og kaffi. Þvílík himnasæla! Ég er að hugsa um að gera þetta á hverjum sunnudegi en vonandi ekki alltaf timbraður. Orð dagsins: Grænmetisætur eru.... vitleysingar? Lítið dýrðina:

2004-03-05T12:15:00.000-08:00

Skjótt skipast veður í lofti
Ja hérna. Skaust á fund í morgun sem ég má því miður ekki ræða um vegna samkomulags. Brunaði síðan í körfubolta. Hálftíma of seinn. Jón Pétur, Sölvi og Lazlo leyniskytta voru auðvitað löngu mættir. Við spiluðum nokkra leiki og ég held að skotnýting mín hafi verið um 2% í leikjunum. Ég held ég þurfi nýjar linsur, það er ekki eðlilegt hvað ég er óhittinn. Okkur Sölva tókst þó að samstilla okkur ágætlega, tókum þá undir lokin. Lazlo á sér punkt á þriggja stiga línunni sem bara klikkar aldrei hjá honum. Fór í mínar fínustu taugar að hann skildi alltaf hitta. Ég held að hann hljóti að hafa æft sig mikið í þriggja stiga skotum. Mig langaði að elda gúllas úr honum. Dálítið seigur undir tönn kannski.
Hélt svo í tíma hjá Þorfinni Skúla sem fékk Gísla Martein til þess að halda smá tölu um viðtalstækni í seinni tímanum. Gísli var þrælfínn, skemmtilegur náungi og greinilega eldklár. Talar gríðarlega hratt og nánast án tafa. Sagði meðal annars frá því þegar hann heimsótti Larry King. Larry ku vera hálfgerður dvergur um sjötugt sem á fyrrum klámmyndaleikkonu um þrítugt fyrir eiginkonu. Larry sagðist ekkert undirbúa sig undir viðtöl, hans undirbúningur fælist í því að fylgjast vel með því sem væri að gerast í heiminum og hitta kunningja í morgunkaffi til að ræða málin. Besta spurningin væri "why" eða af hverju. Það væri ómögulegt að svara henni með jái eða neii og kallaði alltaf á spjall.
En af hverju skipast skjótt veður í lofti? Þegar ég kom heim, hjólaði í frábæru veðri, þá beið mín A4 umslag með einhverju kassalaga í botninum. Ég sá strax að það væri frá einhverjum bresku skólanna sem ég sótti um fyrir mánuði síðan. Reif það upp. Sturtaði úr því bréfum og geisladiski og slides-myndum sem fylgdu umsókninni minni. Hugsaði strax með mér að það væri verið að endursenda mér umsóknargögn og þakka fyrir áhugann en því miður fengi ég ekki inngöngu. Það kom mér því undarlega á óvart að sjá "Letter of Acceptance" fyrirsögn á fremstu síðu. Ég komst inn í Central Saint Martins college of Art and Design . Ég hélt að það myndi grípa mig mikil gleði en það kom bara svona .... hlutleysistilfinning. Gleðin var til staðar en kvíði jafnaði hana út og úr varð hlutleysi. Þetta er nefnilega ansi þekktur skóli og þykir voða artí fartí og flottur að ég held. Ég bjóst ekki við því að komast inn, eiginlega alls ekki og sótti eiginlega um hann ,,í leiðinni". Taldi mig eiga möguleika á hinum en erfiðara væri að komast inn í þennan. Þannig að ég er eiginlega ekki búinn að átta mig á hlutunum.
Staðan er því orðin sú að Ólöf fer í svakalegan skóla og lærir eitthvað rosalegt í Imperial College og ég fer í einhvern rosa rosa skóla sem krefst þess að ég sé ægilega sniðugur og skapandi og hæfileikaríkur. Hjálp!! Nú verður ekki aftur snúið hjá okkur. Vona að allt eigi eftir að ganga vel. CSM er snilldarvel staðsettur við Charing Cross Road sem hlýtur nú að teljast gott í svona hrikalega víðfeðmri borg. Maður getur þvælst með lest í tvær klukkustundir en þó verið enn í miðbænum. Svakalegt. Svona lítur byggingin út:

2004-03-04T09:50:00.000-08:00

Gamli sorrí gráni!!!
Mér er sorg í huga og mér sortnar fyrir augum! Það hefur komið fyrir að Ólöf hefur slitið eitt grátt hár úr höfði mér. Þá hef ég nú bara sagt að það sé stökkbreytt eða gallað og algjört einsdæmi. Ólöf hefur þá pínt mig og sagt að ég sé að verða gráhærður en ég svarað því til að það sé ómögulegt, ég verði í fyrsta lagi grár í vöngum um fimmtugt. Hefnist mér nú fyrir sjálfsöryggið. Ég kíkti í spegil áðan og sé að það eru nokkur grá hár að fela sig milli dökkra! Ég er ekki einu sinni orðinn þrítugur!! Þar að auki held ég að ég sé á góðri leið með að verða sköllóttur, það hækka sífellt kollvikin. Fyrir tíu árum var línan alveg bein. Það eina jákvæða er það að vita af því að maður sé með sæmilegan testósterón-búskap.
En hvað finnst lesendum um þetta? Er þetta ekki skelfing? Verð ég ekki asnalegur sköllóttur? Á ég að fara að setja skol í hárið á mér þegar ég fer í klippingu? Eða á ég að taka öllu með karlmennsku og safna gráu hári og bumbu? Til hvers að vera eitthvað að hugsa um útlitið, maður verður hvort eð er grár og siginn á endanum, ekki satt?
Tókum okkur upp á vídeó í ,,meðferð talaðs máls" að lesa frétt og það er mjög skrítið að horfa á sjálfan sig þannig. Mikil, hvít birta sem fer óblíðum höndum um hvíta húð og bauga. Maður er annars algjörlega óhæfur til þess að dæma eigin frammistöðu í þessu sambandi held ég. Veriði hress, ekkert stress, bless.

2004-03-03T02:40:00.000-08:00

Eitthvað
Heimsmeistaramótið í einhverju var haldið á Öldugötu 47 þann 1. mars síðastliðinn. Sigraði þar Einhver með yfirgnæfandi einhverjum stigum eftir harða baráttu við Einhvern annan. Einhver sýndi ótrúlega fimi þegar hann þuldi eitthvað upp í einhvern tíma samfleytt allt kvöldið og þótti viðstöddum eitthvað koma til þess. Einhverjir voru margir og eitthvað afar fjölbreytt einhvers staðar og einhvern tíma aftur stendur til að gera eitthvað aftur með einhverjum hætti. Veitingar voru einhverjar, borið var fram gulróta-eitthvað með einhverri sósu, eitthvað kex með einhverjum osti og eitthvað goskyns drukkið einhvern veginn með því. Að lokinni keppni tók eitthvað annað við og fengu viðstaddir að spreyta sig í einhverju í einhvern tíma og voru efnistök eitthvað allt annað en einhverjir aðrir höfðu beitt í sínu einhverju.

Annars er Reykjavík borg geðklofans. Viðbjóðslegt veður í gær, ég hjólandi í suddanum. Ingólfur hefði nú frekar átt að skýra þetta Veðravíti, Óveðursvík eða Rigningarvík. Mikið svakalega langaði mig til heitari landa þegar ég kom inn úr óþverranum í gær, algjörlega blautur inn að skinni. Eins gott að sumarið verði sólríkt því annars leggst maður í langt og mikið þunglyndi.

2004-03-02T03:51:00.000-08:00

Komiði margblessuð og alsæl.
Björg mágkona mín og fyrrverandi eiginkona besta vinar míns sem er fyrrverandi svili minn (!!!!!) ritar áhugaverðan pistil um trúarleg málefni á vefsetri sínu. Ég er sammála henni í mjög mörgu varðandi trúarviðhorf eða hversu trúaður ég er. Maður er skírður, fermdur og sumir gifta sig en allir jarðaðir af kirkjunni. Ég vil nú eiginlega frekar láta brenna mig heldur en að ormar éti mig. Það er önnur saga. Ég var líka signdur, ég fór með Faðir vor-ið á kvöldin fram að ??? aldri og tók meira að segja ferminguna alvarlega! Það er alveg satt, ég spáði mikið í þetta og hlustaði af mikilli athygli á prestinn sem leit þá út fyrir að vera hundrað ára en lifir enn, að ég held. Ég stóð mig líka afskaplega vel í kristinfræði þegar ég var í barnaskóla, var alltaf með 10 enda gerði ég ótrúlegar vinnubækur með myndskreyttum dæmisögum Jesú (m?) og allt heila klabbið. Það er kannski af því að sögurnar voru góðar. Ég fór reyndar í svona kristilegar sumarbúðir sem mér fannst skelfilega óhugnanlegar, maður var rifinn upp við fyrsta hanagal af einhverjum ofstækismótmælendum og píndur til að syngja Jesús er besti vinur barnanna og önnur leiðindi. Maður fékk aldrei frið til þess að njóta lífsins þar sem sífellt var verið að draga mann í einhvern söng eða trúarleiki. Dvöl mín var stutt, ég var 7 eða 8 ára held ég, endaði með því að einn halelúja-gaurinn fann mig inni í skápi þar sem ég var að fela mig svo ég þyrfti ekki að fara í múgsefjunina fjórum sinnum á dag. Hringdi kjökrandi í mömmu og lét hana sækja mig hehehehe. Ég var lítill ræfill.
Síðan kemst maður til vits og áttar sig á því að þetta er allt saman rugl. Trúarbrögð eru ágætis stjórntæki og siðferðisreglur. Kristni leggur áherslu á að elska náungann og þess vegna biðjum við með börnunum þegar þau fara í háttinn. Ekki af því að við trúum því að María hafi ,,haft mök við grímuklætt útfrymi með pípuhatt" eins og segir í afar róttæku dægurlagi. Í sama lagi segir að Guð búi í garðslöngunni og gaddavírnum og maður spyr sig -til hvers gerir hann það?
Mér finnst alltaf jafn merkilegt að hlusta á fullorðna menn í kjólum halda því fram að Guð sé til og að þeir efist alls ekkert um það að hann hafi sent okkur Jesú. En Biblían er auðvitað stórmerkileg burt séð frá því. Frábær leiðarvísir fyrir utan karlrembu og ójafnrétti. Manni líður samt alltaf vel að hlusta á prest þegar einhver deyr, þeir eru traustvekjandi þegar þeir gefa fólk saman (verst að þeir geta ekki tryggt hamingju hjóna í leiðinni) og voðalega gaman að sjá þá hella vatni á hausinn á ungbörnum. Ég held að flestir séu sammála um það að kirkjan verði að vera til staðar fyrir slíkar athafnir.
Einu sinni kom einhver trúboðinn í heimsókn þegar ég bjó hjá mömmu. Vildi selja mér einhvern Jesúm-snepil á okurverði. Ég spurði hann hvort hann tryði því að Adam og Eva hefðu verið fyrstu manneskjurnar. Jájá hann gerði það. Hvort hann tryði því að Eva hefði orðið til úr rifi Adams. Jájájá. Hvort hann tryði þá ekki á þróunarkenningu Darwins. Smá fát en jú hann trúði henni. Hvort Adam og Eva væru þá ekki skáldskapur. Neineinei. Ég keypti ekki snepilinn og trúboðinn brosti vandræðalega og fór. Ég held ég hafi nú verið unglingur þá og myndi ekki detta í hug núna að eyða tímanum í svona vitleysu.
Mér finnst biskup Íslands einn leiðinlegasti maður sem ég hef nokkurn tíma hlustað á. Það er honum ekki að kenna, það er hluti af starfi hans að vera leiðinlegur. Íhaldssemin er verri. Hann er ábyggilega á móti hjónabandi samkynhneigðra. Á móti ættleiðingum samkynhneigðra. Hins vegar mega hvaða idíótar sem er eignast börn.

Þess má að lokum til gamans geta að ég er staddur í ríkisútvarpinu og er búinn að skrifa tvær erlendar fréttir sem voru lesnar kl. 10 og 11! Jibbíí. Nú er ég að blogga sem ég vona að enginn sjái, a.m.k. ekki þeir sem völdin hafa við mannaráðningar. Að lokum: Tveir apakettir og ein górilla:

2004-03-01T08:14:00.000-08:00

Komiði sæl. Ég hef nú einhvern tíma sagt það í einhverju besserwisser-kastinu að blogg væri algjör vitleysa og tímasóun öðrum en þeim er í útlöndum búa. Ég held þessu enn fram en vil bæta við að það er afsakandi ef maður þarf að skila inn dagbók vegna textargerðarkennslu í Háskólanum. Það verður samt ekkert betra blogg þó svo að kennari lesi það. Það er líka bara allt í lagi og hananú!
Við Spaðinn sáum alveg svakalega krúttulega mynd í Sjónvarpinu í gærkvöld sem ég man nú ekki hvað heitir. Hún var frönsk en tekin í Teheran í Íran. Lítill, íranskur drengur sækir skó systur sinnar til skósmiðs en týnir þeim á leiðinni heim. Þar sem hann er af fátækri fjölskyldu sem hefur ekki efni á nýjum skóm ákveður hann að segja foreldrum sínum ekki frá þessu. Þau systkinin óttast reiði föðursins og ákveða að deila skópari stráksins þar til hinir skórnir finnast. Litla stelpan hleypur því á hverjum degi, í of stórum strigaskóm, úr skólanum og hittir bróður sinn á leynistað þar sem þau skiptast á skóm. Strákurinn er afburðanemandi en fer að mæta of seint dag eftir dag þó hann hlaupi eins og vindurinn í skólann á hverjum degi.
Strákurinn sér sér leik á borði þegar víðavangshlaup barna er auglýst þar sem þriðju verðlaun eru glænýjir strigaskór sem hann hyggst skipta í stelpuskó og gefa litlu systur sinni. Hann hleypur en vinnur óvart keppnina og fær verðlaunapening um hálsinn hálfgrátandi. Snökt, snökt. Myndin endar þó vel þar sem pabbanum áskotnast peningar og hann kaupir nýja skó handa þeim báðum.
Það er í fyrsta lagi gaman að sjá s.k. ,,mannlegar myndir" frá ómennskum löndum eins og Íran. Ég segi ómennskum því maður veit fátt annað en vont til þess lands. Nú væri gaman að sjá svona mynd frá Haiti eða Afganistan. Í öðru lagi var hún frábærlega leikin af börnunum, ég táraðist þegar sá stutti táraðist. Grátandi drengur er alveg pottþétt aðferð til þess að láta mann skæla og klassískt listaþema. Þarf eiginlega að kaupa mér svoleiðis mynd til að hengja upp heima, var einu sinni nálægt því í Kolaportinu en karlinn á básnum vildi fá fimm þúsund kall minnir mig og mér fannst það aðeins of dýr brandari. Í þriðja lagi er sagan alveg dásamlega einföld en samt svo ótrúlega mikil dæmisaga um vilja mannsins og góðmennsku og blablabla. Sem sagt alger snilld þessi mynd. Fjórar stjörnur.´
Daði kom í heimsókn laugardagskvöldið sem Ólöf fór á fyllirí með litlu vinkonunum sínum. Við horfðum á kvikmyndina In the Cut með krúttubúttunni Meg Ryan. Gamla góða Meg sýnir mjög oft brjóstin í myndinni sem eru nú ekki mjög merkileg, dálítið svona eins og vatnsblaðra sem búin er að missa helming vatnsins. Það þótti okkur hins vegar afar merkilegt í mynd frá höfuðlandi siðvendninnar sem varla má brjóst sjá, að karlmannslimur sást þar barasta í nærmynd ganga inn og út úr munni óþekktrar kvensu. Er Hollywood að nálgast Frakkana svona svakalega? Hún Meg og mótleikari hennar sem heitir hinu afar karlmannlega nafni Marc Ruffalo (allt karlmannlegt sem rímar við buffalo!) hafa nú kynnst ansi vel við tökur myndarinnar. Mun hans karlmannlega nef hafa komist ansi hreint nálægt kvenlegasta kima ungfrú Ryan. Skelfiskur með öllu, svei mér þá.
En það var nú ekki ætlunin að klæmast á þessari síðu. Þetta er eiginlega mjög svekkjandi mynd og ég hvet fólk til þess að sniðganga hana. Nema það langi óstjórnlega mikið að sjá óþekktan reður og tepokabrjóst. Það er nú varla 500 króna virði.
Jane Campion virðist vera einnar myndar leikstjóri eins og það er kallað í bransanum.

2004-02-23T11:41:00.000-08:00

bla bég veit ekki af hverju það er allt í rugli æ ú þ ð á ... hm núna er þetta í lagi. Smá tékk, nennir einhver að commenta á síðuna þannig að maður viti hvort einhver les þetta eða ekki? Leiðinlegur dagur, allt í rugli og arrgggg prump!

2004-02-19T07:17:00.000-08:00

?a? er or?i? mj?g langt s??an ?g skrifa?i seinast. Vi? ?l?f h?fum b??i veri? haldin v?gu vetrar?unglyndi enda varla h?gt anna? ?egar ma?ur ?arf a? berjast vi? rok og rigningu daglega. ?a? allra lei?inlegasta er a? hj?la ? m?ti vindi og regni klukkan ?tta ? morgnana. ?g ger?i ?a? enn eina fer?ina ? dag. ?ar vi? b?tist algj?rt ?hugaleysi mitt ? n?minu n?na, ?g veit ekki hva? ger?ist ? byrjun ?rs en ?a? er eins og hafi sl?kkna? ? ?hugast??vum heilans. ?g hef samt teki? eftir svipu?u ?hugaleysi ? bekknum ?annig a? ?a? vir?ist sem ?g s? ekki einn um ?a?.
Vi? f?rum ? heims?kn ? R?kis?tvarpi? fyrir fj?rum d?gum s??an. ?ar hittum vi? fyrir fr?ttastj?rana K?ra og El?nu. Vi? eigum a? fara ? starfs?j?lfun b??i hj? ?tvarpsdeild og sj?nvarpsdeild. Einhverra hluta vegna kv??i ?g ?v? a? ?urfa a? skrifa fr?tt ?ar og ganga fr? henni, m?r finnst ?g algj?rlega kominn ?r ?eirri litlu ?j?lfun sem ?g var ? undir lok bla?amennskun?mskei?sins. ?a? er einhvern veginn svo ?ruggt a? sitja bara og skrifa allan daginn en mun ?hugnanlegra ef ma?ur ?arf a? lesa inn sj?lfur og taka vi?t?l ? mynd og allt ?a?. Vona a? ?a? fari vel.

2004-02-08T07:13:00.000-08:00

Hann lifir! Húrra! Húrra!
Níels er fundinn, ég ákvað að kíkja enn einu sinni í þvottahúsið og þar var hann bak við hurð. Hann var dálítið úfinn og allur í sagi. Hann vældi ekkert, sem er mjög ólíkt honum og það virðist sem hann hafi lent í einhverri baráttu. Ólin hans var dálítið tætt og svona. Hann fékk lifrarpylsu og skinku og svo urðum við að henda honum í sturtu. Hann var svo máttlaus að hann hreyfði varla mótmælum. Svoná lítur hann út núna, nýkembdur og fínn.

2004-02-08T04:24:00.000-08:00

Tveir sólarhringar eru liðnir og Níels ekki kominn. Kona sem býr á móti okkur hringdi og sagðist hafa séð hann á hádegi á föstudag. Við bárum nefnilega út miða í göturnar í nágrenninu með mynd og lýsingu. Nú er maður kominn á sjálfsásökunarstigið: Ég hefði ekki átt að hleypa honum út, ég hefði átt að gá fyrr að honum, ég hefði...... Hann er þó merktur á eyra og ól. Vona bara að við fáum að vita af honum hvort sem hann er lífs eða liðinn. Litli sæti Níels buhuhu....

2004-02-07T10:02:00.000-08:00

In memoriam?
Nú hefur Níels ekki sést í einn og hálfan sólarhring og það er -10 úti. Ég er ansi hræddur um að hann sé farinn á vit feðra sinna..... það er sorglegt. Myndir af litla greyinu á síðunni hennar Ólafar þannig að þið megið láta þetta berast til allra sem búa vestan við læk. Við erum alla vega búin að heita því að hleypa honum aldrei aftur út ef hann finnst og gefa honum tvo lifrarpylsukeppi í matinn til hátíðarbrigða en það er uppáhaldsmaturinn hans. Krossum fingur....

2004-02-03T12:38:00.000-08:00

....og drasl sem við þurfum ekki. Ólöf keypti sér 11. skóparið og ég fékk mér reyndar líka skó. Við Friðrik fórum saman í búðir og vorum afskaplega sætir saman. Um kvöldið hélt hersingin í kvikmyndahús að sjá ,,Strokukviðdóminn” eða Runaway Jury. Hún er pulsa. Með því á ég við að pulsa er alltaf góð á bragðið en skilur ekki mikið eftir sig en nautasteik er meiri bragðlaukaupplifun. Lost in Translation er nautasteik til dæmis.

Morguninn eftir héldum við inn til Lundúna með þeim skötuhjúum. Heimsóttum „rúms-og –morgunverðar“ hótelið okkar þar sem Indverji með loðin eyru tók á móti okkur. Með loðnum eyrum á ég ekki við hár út úr hlustum eins og á gömlum körlum heldur stífan brúsk úr brjóskröndum eyrnanna. Reyni að finna mynd af þessum merkilegheitum síðar. Við þurftum að bíða eftir því að herbergið væri þrifið og fórum niður í borðstofu sem var í kjallara. Þar gleymdi Indverjinn okkur og við sátum og biðum lengi, lengi. Þá fór okkur að leiðast þófið, fórum upp aftur og þá vaknaði okkar maður og sagði að herbergið væri tilbúið.
Þegar við pöntuðum herbergið var okkur sagt að það væri ”bathroom” innifalið. Hið s.k. baðherbergi var plastskápur um tveir metrar á breidd og einn metri á dýpt. Þegar maður sat og gerði stykkin sín gat maður sett iljarnar í sturtuvegginn. Það var hægt að fara í sturtu og hægja sér um leið sem mörgum þætti sjálfsagt þægilegt og gott ráð til tímasparnaðar. Rúmið var í raun rúm í fleirtölu þar sem um tvö einstaklingsrúm var að ræða sem ýtt var saman þannig að annar aðili óhjákvæmilega lak niður í sprunguna um nóttina. Gaman að því.

Við skelltum okkur á Leicester square í hið s.k. Kínahverfi sem er í raun fjórar götur við torgið. Þar héldu Kínverjar upp á ár apans með tilheyrandi látum. Það reyndist þó erfitt að koma auga á Kínverja fyrir ferðamönnum og öðrum skríl. Við vorum fljót að forða okkur úr þessum troðningi sem minnti á 17. júní eins og hann gerist stundum verstur. Ákváðum að bruna í Tate modern listasafnið og berja dansk-þýska Íslendinginn Ólaf Elíasson augum. Er hann kannski íslensk-danskur Þjóðverji? Safnið sem bygging er ákaflega tilkomumikið, gamalt raforkuver sem breytt var í listasafn.
Sýningargestir lágu eins og hráviði um öll gólf þegar inn var komið og dáðust til skiptis að spegilmynd fjöldans í loftinu og sólinni í enda rýmisins. Það sem er einna flottast við sólina, sem í raun er hálfmáni sem speglast, er það að speglunin veldur rákum í henni sem minnir á sólarupprás eða sólsetur. Ég tók helling af myndum enda með stafræna vél og engu sóað. Varanlegar sýningar safnsins eru ekki síður merkilegar en við Ólöf þurftum að hlaupa í gegnum það þar sem við urðum að drífa okkur heim til þess að undirbúa okkur fyrir kvöldið með Jóni Gunnari og Kötu. Mæli með því við alla að skreppa til London og kíkja á söfn.
Við spændum heim og fórum inn í plastskápinn til að sturta okkur og reiknuðum okkur tuttugu mínútur til þess að komast á ákveðinn mótsstað á Liverpool Street. Það var grófur misreikningur. Ferðalagið tók okkur þrjú kortér og þá tók við um fimmtán mínútna spretthlaup að leita að Starbuck´s staðnum sem við ætluðum að hittast á. Komumst að því að þeir væru þrír við þessa lestarstöð og þar að auki lokaðir. Eftir nokkra spretti ákvað ég að hringja í Jón Gunnar og kom þá í ljós að þau voru nánast fyrir framan nefið á okkur. Það jók matarlyst hins vegar að hlaupa aðeins um lestarstöðina og allt var í góðu.

Héldum ásamt Jóni Gunnari, Kötu og þremur vinum þeirra á indverskan stað sem var afskaplega góður og ekki var það verra að fólk mátti koma með vín með sér. Við stútuðum nokkrum hvítvínsflöskum þar og héldum svo á bari að hella enn meira í okkur. Þar hitta ég stóran og mikinn, svartan mann sem kallaði mig Charlie. Það tók mig um fimm sekúndur að átta mig á því að hann væri að bjóða mér kókaín. Maður er bara svo sveitó. Enduðum kvöldið heima hjá Kötu og co. þar sem við átum gríðarlegt magn af saltpillum og kexi með smurosti. Ég hafði vit á því að fá mér ekki rauðvín sem sjálfsagt bjargaði mér frá þeirri „þynnku dauðans“ sem ég er frægur að endemum fyrir.
Sunnudagurinn var fyrsti dagurinn okkar Ólafar í þessu fríi, þ.e. við vorum bara tvö saman að eyða peningum og skoða föt og fólk. Fórum í stærstu Top shop í heimi þar sem er sérhæð eingöngu fyrir eyrnalokka að flatarmáli svipuð Ikea hér heima. Ólöf fór inn í þá deild og kom út þremur dögum síðar. Ég fór og keypti mér eiturlyf á meðan í Boots, parasetamól með koffíni. Kíktum inn í tvo skóla með umsóknir, Chelsea og Central Saint Martins en sá síðarnefndi er snilldarlega staðsettur við Charing Cross Road í miðbænum. Hittum líka Clyde í Kings College. Ólöf átti stefnumót við hann en maðurinn er yfir ónæmisfræðinni í þeim háskóla. Clyde sýndi okkur alla líffræðihæðina og sýndi okkar allar skrifstofur allra prófessora og kennara og útskýrði verksvið þeirra. Því næst fórum við á pöbbinn og fengum okkur „pöbb-lönsj“ sem Clyde hreinlega splæsti á okkur og tók engu tali þó krefðumst þess að borga fyrir okkur. Ólöf komst að því að það nám væri eiginlega ekkert fyrir hana en við fengum þó alla vega ókeypis hádegismat og bjór!

Við kíktum svo á Saatchi safnið þar Young British Artists eru með verkin sín. Fyrir þá sem ekki vita þá er það hópur listamanna sem olli talsverðum breytingum á listalandslaginu í Bretlandi, talað um að YBA hafi blásið lífi í staðnaðan bransa. Það sem heillaði mig hvað mest við verkin þeirra var tæknileg fagmennska, handbragðið var ekki síðra en hugmyndirnar. Frábærir málarar, ljósmyndarar, myndhöggvarar o.s.frv. Damien Hirst er sjálfsagt þekktastur þeirra, gaurinn sem sýnir dýr í formaldehíði, manstu? David Bowie er víst í húsnæðinu við hliðina á Saatchi en hann ku vera einn mesti listaverkasafnari í heimi. Gaman að vita það.
Innblásin af listrænum hluta menningar héldum við á vit lágmenningarinnar, þ.e. verslana. Að rápi loknu fórum við á afskaplega ljúfan, ítalskan veitingastað sem heitir Carluccio´s. Ég fékk mér osso bucco og Ólöf fékk sér einhver sveppafiðrildi. Skolað niður með ítölsku rauðvíni. Þannig sé ég Himnaríki fyrir mér: Ítalskur matur og ítalskt rauðvín, frönsk súkkulaðikaka í eftirrétt með ítölsku kaffi. Fengum okkur sveitaskinku í forrétt. Betra en kynlíf? Heyrði einhvers staðar að konur tækju súkkulaði fram yfir kynlíf... hvað segja stelpurnar um það? Við hlupum að því loknu í bíó að sjá „Kaldbak“ eða Cold Mountain. Hún er nú ekki beint pulsa en alls engin nautasteik heldur. Jude Law þjáðist þar í rúmar tvær klukkustundir og Ólöf svaf af sér um þriðjung myndarinnar. Þrátt fyrir nokkra góða kafla verður þessi mynd eiginlega að teljast leiðinleg. Hún er eiginlega matarkex án kaffibollans sem er nauðsynlegur til þess að bleyta upp í því. Þar með lýkur Lundúnaupprifjun minni og birti ég hákarl Damiens Hirst sem við Ólöf sáum í Saatchi.

2004-02-01T03:49:00.000-08:00

Þar sem minnið hefur versnað svo með aldrinum þá gleymi ég ævinlega að rita í dagbók. Hér koma því margar málsgreinar í einni syrpu. Þann 22. janúar stigum við Ólöf glöð í bragði upp í sjálfrennireið sem færði okkur að Leifsstöð. Eins og Íslendinga er siður þá fengum við okkur bjór í kaffiteríunni. Ólöf er nú svo ung að hún kynntist bjór fyrst áfengis, það var búið að leyfa hann þegar hún hóf áfengisdrykkju. Ég er hins vegar svo gamall að það var bara hægt að fá bjór úr fríhöfninni þegar ég var sextán ára. Þó ekki svo gamall, bjórinn kom þegar ég var sautján ára ef ég man rétt.

Það er af sem áður var að allt sé miklu ódýrara í fríhöfninni í Keflavík. Nú kaupir maður varla nokkurn hlut þegar maður er að fara utan en kaupir sér kannski smá líkjör og rakvélarblöð á heimleiðinni. Það munar um 300 krónum á bjórkippu þar og úti í ,,ríkinu” þannig að það borgar sig ekki að eyða kvótanum í bjór. Maður kaupir sér hins vegar risavaxið súkkulaðistykki til að maula í flugvélinni, 400 grömm báðar leiðir. Ég er líka heimsmeistari í því að fitna hratt, skyldi ég geta nýtt mér það einhvern veginn?

Við lentum um sexleytið í London á Stanstedflugvelli. Hann er mun verr staðsettur en Heathrow, í útjaðri borgarinnar. Borgin er helv... stór þannig að það kostar um 3000 kr. að fara í lest frá flugvellinum inn í borgina. Það má bæta þeirri upphæð við miðann frá Iceland Express. Þegar inn í borgina var komið tók við önnur lest og svo enn önnur lest sem flutti okkur til Brighton, strandbæjar nálægt London. Ferðalagið frá Stansted að Brighton og til baka fyrir tvo kostar um 12000 krónur. Fyrir þann pening getur maður flogið til Ítalíu frá sama flugvelli. Verðgildi peninga er undarlega afstætt.

Það tók um þrjár klukkustundir að komast til Brighton. Þar tóku Unnur (vinkona Ólafar til fimmtán ára) og Friðrik kærasti hennar á móti okkur. Þau búa í íbúð við ströndina sem þykir mjög gott af nemendum að vera. Vill svo heppilega til að foreldrar Friðriks eiga íbúðina. Af hverju á maður ekki svona foreldra sem eiga íbúðir úti í heimi? Við fengum meira að segja okkar eigið herbergi hjá þeim en höfðum búist við því að sofa á gólfinu og búin að sætta okkur við það í huganum. Húrra fyrir Unni og Friðrik! Við skelltum okkur á indverskan veitingastað í ódýrari kantinum og borðuðum grænmetismáltíð að indverskum sið og skoluðum honum niður með Tiger bjór.

Eitt af markaðsbrögðum samtímans er að gera vörur framandi og þ.a.l. spennandi. Tiger bjór er breskur en látinn líta út fyrir að vera indverskur. Það halda allir að hann sé þaðan og því er mjög spennandi að drekka Tiger, indverska bjórinn. Það er mjög traustvekjandi að kaupa þýskan bíl en vélin er kannski sett saman í Japan og hitt í Kóreu. En hvað um það, skiptir ekki máli. Morguninn eftir skoðuðum við Brighton sem kalla mætti stúdentabæ, það eru nokkrir háskólar í og í kringum bæinn. Það búa um 300.000 í Brighton sem væri þá borg á okkar mælikvarða en varla á breskan.

Ég fór að hitta frú Söruh Elliott hjá Brightonháskóla. Sarah hefur yfirumsjón með hönnunardeild skólans en lista- og hönnunardeildir hans eru afar vel staðsettar í miðbæ Brighton. Ég afhenti umsókn mína til mastersnáms í ,,röðunarhönnun og myndskreytingum” / Sequential Design and Illustration. Þessi þýðing mín er ekki endilega rétt en námið snýst um myndhönnun sem tengist frásögn eins og teiknimyndir, heimildarmyndir, myndasögur og myndskreytingum. Nánar má fræðast um námið á heimasíðu skólans.

Sarah er afar viðkunnanleg kona um fimmtugt með úfið, gránandi hár og á auðvelt með að uppfræða feimna Íslendinga. Ég þurfti lítið að hafa fyrir viðtali okkar þar sem hún lét móðan mása í um klukkustund og fór stór hluti þess tíma í skoðunarferð um bygginguna. Þar kíktum við inn í ýmsar vinnustofur og þótti mér afar traustvekjandi að sjá nemendur að störfum. Það er nefnilega ekki svo algengt að sjá listnema að störfum í Listaháskóla Íslands. Þeir eru sennilega alltaf í Spútnik að kaupa sér ónýt föt eða heima að lita hárið á sér grænt.

Frú Elliott fullvissaði mig um það að umsækjendur utan Evrópusambandsins ættu ekki greiðari aðgang að náminu þó svo þeim fylgdu miklar fúlgur fjár. Það sem máli skipti væri mat kennara á möguleikum þeirra og sjálfstæðum vinnubrögðum. Brightonháskóli er í áttunda sæti í gæðamati á lista- og hönnunarnámi í Bretlandi þannig að eitthvað hlýtur að vera varið í skólann. Að lokinni skoðunarferð þakkaði ég Söruh kærlega fyrir að eyða dýrmætum tíma sínum í auman Frónbúa.

Við eyddum að sjálfsögðu miklum peningum í föt og annað í Brighton. Gamall karl plataði mig í að kaupa svartan leðurjakka sem mér tókst að spretta saumi í nokkrum dögum síðar. Þegar ég var að máta jakkann æpti nærstæddur maður að konu: ,,Show us yer cock!” eða ,,Sýndu okkur skaufann á þér” og olli það mér miklum heilabrotum. Kannski var konan tvítóla eða kannski var þetta ekki kona. Ég mun aldrei komast að því.
Um kvöldið grilluðum við kjúkling að hætti Jamie Oliver, átum salat og kartöflur og drukkum mikið rauðvín með. Héldum svo rjóð í vöngum á Pu-na-na, skemmtistað eða klúbbi sem spilar þekkt danslög sem er búið að eyðileggja með Jamaica-stælum. Menn geta ímyndað sér Bee Gees með ,,jaa-mann” inngripi, ekki flott vægast sagt. Þar tókst okkur þó að dansa aðeins en fórum tiltölulega snemma heim. Morguninn eftir var ég að venju þunnur eins og alltaf gerist við minnsta áfengissmakk hjá mér en ég hresstist fljótt eftir að ég fékk mér lasagna og kók. Þá fórum við og eyddum meiri peningum í hégóma....(framhald í næsta bloggi)

2004-01-18T14:32:00.000-08:00

Jæja það er nú greinilegt að Vaughn- myndbirtingin æsti bara mína Ollu og ljóst að hún myndi dömpa mér í hvelli ef hann gerði hosur sínar grænar fyrir henni. Hún fær að kenna á því í lok þessa pistils.
Þessa helgi var ég Helgi helgapabbi. Máni stubbur var í miklu stuði og fékk svo sannarlega sinn skerf afþreyingar. Á föstudaginn, eins og fyrr var getið, var troðið í hann hamborgara og frönskum. Það er nú allt í lagi því hann er bara tuttugu kíló og mætti nú aðeins bæta á sig greyið. Hann verður nú a.m.k. að komast í millivigt svo hann geti lamið frá sér í skólanum. Hann fór í afmæli í gær til Bjarka sem á að vera stríðnispúki en þegar ég sótti hann var púkinn slíkt lamb að erfitt var að ímynda sér úlf undir gærunni.
Gærdagurinn var annars skelfilegur að því leyti að við Ólöf vorum á eftir áætlun allan daginn. Fyrst var það forsýning eða „generalprufa“ á Chicago í Borgarleikhúsinu. Mættum á slaginu 14.00 þegar sýningin átti að hefjast. Hún hófst hins vegar ekki fyrr en hálftíma síðar. Það tók okkur tuttugu mínútur að komast út af bílastæðinu fyrir framan leikhúsið þar sem um 300 bílar þröngvuðu sér út um eina útkeyrslu. Máni var því klukkutíma lengur í boðinu en önnur börn og ég þ.a.l. eitt hinna óþolandi foreldra sem sækja börnin sín allt of seint. Chicago var vel heppnað stykki en mér tókst ekki að njóta seinasta hálftímans þar sem ég var bæði í pissuspreng og í spreng að komast burt til að sækja Mána. Borðaði svo yfir mig í afar síðbúnu jólaboði.
Helgi helgapabbi fór á bíó með soninn og laug því að hann væri ekki orðinn fimm ára til að spara sér 400-kall. Það er bara ekki sanngjarnt að borga fullt verð fyrir dverg! Kvikmyndin var hundleiðinleg, Looney Tunes með leikurum. Kvikmynd með teiknimyndum í bland. Það eina sem var fyndið í henni var eltingaleikur með Daffy Duck, Bugs Bunny og Elmer Fudd sem var að venju með tvíhleypuna að reyna að skjóta þá í Louvre-safninu. Þeir hlupu inn í hin og þessi málverk sem fræg eru eftir Munch, Dali, Monet o.fl. Þeir láku niður bókstaflega í Dali-verkinu, leystust upp í punkta í impressjónistaverkunum og öskruðu allir í Ópinu eftir Munch. Annar aðalleikaranna var hinn óþolandi Brendan Fraser en ljósi punkturinn var hin snoppu- og baksvipsfríða Jenna Elfman. Máni skemmti sér auðvitað konunglega enda mikill bíódýrkandi. Ég mæli ekki með þessari mynd. Hins vegar sá ég fyrir skömmu Punch-Drunk Love sem er alveg snarklikkuð og mjög skemmtileg. Hér kemur Jenna sæta:

Og hinn óþolandi Brendan Fraser:

2004-01-17T05:13:00.000-08:00

Í dag fengum við frumlegt og skemmtilegt verkefni í textagerð. Við áttum að skrifa fréttatilkynningu fyrir nýja vöru á markaði, Gosa spýtustrák og réðum því sjálf hvaða eiginleikum hann byggi yfir. Minn Gosi var vélmenni sem talaði hundrað tungumál, kunni þúsundir sagna, gat passað börn en einnig sinnt almennum heimilisstörfum. Vélmennið lærði af eigendum sínum að greina rétt frá röngu og gekk fyrir sólarorku. Þó þetta hljómi kjánalega þá getur það verið snúið að skrifa litla fréttatilkynningu. Flestir þeir sem ég hitti í dag vildu ræða Idol stjörnuleit sem er ofmetnasta fyrirbæri seinni tíma, sjónvarpsþáttur með söngelsku en hálfkjánalegu fólki sem þráir athygli. Að fenginni reynslu þykist ég alltaf hafa áhuga á því sem almenningur hefur áhuga á því annars er maður álitinn undarlegur og vart viðræðuhæfur. Hins vegar hef ég mjög gaman af mörgum „veruleika“-sjónvarpsþáttum þar sem fólk er niðurlægt á allan mögulegan hátt fyrir það eitt að komast í sjónvarpið og eiga möguleika á háum vinningum. Vitleysingar eru alltaf pottþétt sjónvarpsefni.
Um kvöldmatarleytið fórum við Ólöf og Máni á veitingastaðinn Hróa hött. Hann er afskaplega lummulegur en maturinn fínn og frekar góð tilboð þar. Við flýttum okkur að sjálfsögðu að borða svo við gætum séð „Ædolið“ góða. Idol var eins og það er alltaf: Fólk um tvítugt í kareoke-stemningu að gaula oftast nær leiðinleg lög. Kalli Bjarni er frekar hallærislegur sjómaður sem átti skilið að vinna vegna þess að hann lifir sig alltaf mest inn í það sem hann er að gera og er öruggastur með sig. Það er hins vegar erfitt að skilja múgæsinginn í kringum þessa keppni. Dómararnir segja alltaf það sama og áhorfendur í sal baula alltaf yfir því sem er neikvætt. Síðan talar fólk við stjórnendur sem gera lítið úr dómurunum og svo heldur það áfram. Samt horfir maður á þetta en það er kannski einmitt málið: maður horfir. Ef þetta væri í útvarpi yrði þetta aldrei vinsælt.

2004-01-15T14:24:00.000-08:00

Vorönn hófst hjá mér í dag með því að ég sat í rangri stofu með nokkrum öðrum nemendum úr hagnýtri fjölmiðlun og stjórnmálafræði. Tuttugu mínútum eftir tilskildan byrjunartíma ákváðum við í hagnýtri fjölmiðlun að yfirgefa stofuna þar sem hið „akademíska kortér“ væri liðið. Þá heyrðist hljóð úr horni stofunnar. Þar sat stjórnmálafræðinemi sem sagðist halda að við ættum að vera í Árnagarði. Mér þótti það undarlegt að þessi ábending hefði komið svo seint og hélt með fríðu föruneyti í Árnagarð þar sem yfirfull kennslustofa blasti við. Kynntumst við þar textarýni Þórbergs Þórðarsonar. Að kennslu lokinni heimsóttum við kaffistofu Odda og drukkum þar alíslenskan uppáhelling og bölvuðum kennara nokkrum sem skuldar okkur tvær einkunnir og fjölda verkefna. Samsæriskenningar voru myndaðar en enginn vildi þó gerast svo djarfur að styggja kennarann með bréfum eða símhringingum. Að lokum ræddum við raunir háskólanema sem ekki geta lengur sofið til hádegis heldur neyðast til þess að vakna á sama tíma og vinnandi fólk.
Ég kvaddi samkomuna og hélt út í gaddinn. Hann var svo hvass að ég hugleiddi það hvort ég ætti að skilja hjólið eftir og ganga heldur þar sem það hreyfðist varla úr stað á veginum. Mér tókst þó að komast alla leið að Bankastræti og flúði inn í hlýju Hans Petersen. Kólnaði mér þó allsnögglega þegar ég komst að því að filma sú er ég vildi kaupa þótti tilheyra sérvörudeild og var mér tilkynnt að ég þyrfti að hjóla upp að gamla Sjónvarpshúsinu til þess að nálgast hana. Hálffreðinn komst ég þangað. Var mér þá tilkynnt að slík filma fengist ekki þar. Endaði svaðilförin í Skipholti hjá afar hjálplegum sérfræðingi í ljósmyndabúð og ákvað ég að sniðganga Hans Petersen í framtíðinni þar sem verðlagið væri hærra þar en annars staðar og sömuleiðis væri ekki hægt að fá það sem maður vildi. Að lokinni myndatöku hélt ég heim í heiðardalinn og borðaði yfir mig af kjúklingi unnustu minnar Ólafar Ólafsdóttur líffræðinema.

15. jan. 2004

Þessi önn byrjar með ósköpum. Stofuruglingur í gær og svo vakna ég fimm mínútur í átta í morgun. Tókst að fara í sturtu og koma mér í skólann á tíu mínútum sem mér finnst harla gott. Kynntist Stefáni nokkrum sem vinnur í Seðlabankanum og veit allt um þjóðhagfræði og vill að við vitum það líka. Mig langar ekkert að vita neitt um þjóðhagfræði en neyðist þó til. Vaknaði með vægan hausverk sem entist mér allan daginn þrátt fyrir morgunverð í formi íbúfens. Hausverkur og hagfræði klukkan átta að morgni fimmtudags. Þá tók við ljósvakamiðlun Þorfinns Ómarssonar sem ég held að verði nokkuð skemmtileg. Horfðum á sjónvarpið í tíma, þáttinn Pressukvöld sem er býsna misheppnaður. Spyrjendur ósamtaka, sviðsmynd skelfileg með rauðum og glansandi rimlagluggatjöldum. Dæmigerður þáttur frá RÚV þar sem myndataka er engin og stanslaust skipt milli vinstri og hægri, þ.e. fyrst spyrjandi og svo viðmælandi. Það væri hægt að taka spurningar og svör upp á sitt hvorum deginum því viðmælandi er aldrei í mynd með spyrjendum.
Ákaflega geðþekk kona kennir okkur svo að fara vel með tungumálið okkar. Meðferð talaðs máls er viðfang eins námskeiðsins og í dag fékk ég að kynna mig og fjalla um helstu kosti mína og galla. Þetta gerði ég frammi fyrir bekknum, fólki sem ég þekki þegar og veit allt það um mig sem fram kom í dag. Geðþekka konan virtist nokkuð ánægð með mig og sagði að ég væri alls ekkert óöruggur. Kannski var það hausverknum að þakka. Ég hef sjálfsagt verið með sársaukasvipinn sem einkennir svo marga svala gaura í kvikmyndum. Til dæmis gaurinn í hinum skelfilega þætti Alias eða Launráði eins og Örnólfur Árnason kaus að kalla hann. Kærasti aðalgellunnar er með hausverkssvipinn, lyftir upp brúnum áhyggjufullur og þjáður. Það er töff. Því má bæta við að ég mætti of seint í alla tíma í dag, alls þrisvar sinnum. Geri aðrir betur. Hér kemur Vaughn úr Alias.

2003-12-26T10:31:00.000-08:00

Jæja þá er maður búinn með LOTR pakkann, mynd 3 er bara skrambi góð þó svo stóru skrímslin böggi mig alltaf smá, núna voru það risafílar með fjórar skögultennur. Annars leikarar fínir, Ian McKellan er alltaf snilld, Legolas er algjör kerling en Aragon svalur. En eitt klúður hjá Tolkien, Jóvin er aðalgellan í bókinni/myndinni en Aragon velur frekar leiðinlegu álfastelpuna Liv Tyler, alveg smekklaus þessi Viggo Mortensen. Þetta er Jóvin ofurvíkingabeib

Mikið rosalega langar mig í víkingabrynju núna og sverð og þeysa um á hestbaki, alveg 10 á testosteron-skallanum. Annars bara kátur með jólagjafir og fríið almennt....

2003-12-25T06:57:00.000-08:00

Þessi síða er alveg frábær, svona eiga auglýsingar að vera: http://www.trojangames.co.uk/ ef þetta eru þá auglýsingar. Ef ólympíuleikarnir væru svona myndi ég horfa á allar greinarnar! Annars bara ekkert annað að frétta en ofát og viðbjóðsspik.

2003-12-20T11:58:00.000-08:00

Búinn í prófum og 90% fluttur! Frábært og bráðum getur maður farið að gera það sem mann langar til. Mér og Daða tókst að flytja næstum allt dótið, bara smádót eftir, á 3 klst. og geri aðrir betur. Þýðir kannski að maður eigi ekki mikið en það er bara betra. Það sem er alltaf erfiðast er dótið sem mann langar til að henda en hendir samt aldrei af óskiljanlegum ástæðum. En lifi Öldugata 47 og bæbæ Gestur rugludallur og co. á G14. Vúhúúúú!

2003-12-18T11:33:00.000-08:00

úbbsí þetta er einmitt ekki það sem maður á að vera að gera seinasta dag fyrir próf...,,faaaaalllinnn með 4,9 trallalallalallalaaaaaaa....... Ég hef ekki fallið á prófi síðan á fyrsta ári í stærðfræði í MR en nú getur allt gerst. Heilinn í mér er orðinn svo vanur því að þurfa ekki að muna neitt að hann getur bara alls ekki hlýtt mér og troðið þessu drasli inn í litla, dimma skotið þarna einhvers staðar. Ljóta ljóta ljóta. Hann vill miklu frekar syngja asnaleg lög og hugsa um einhverja vitleysu eins og $!!%$%"% eða þetta:

bölvaður sé þessi grái svampur satans! Hér kemur ein til styrktar Ólöfu Jólahjóls:

Gleeeeeleg jólll

2003-12-18T11:27:00.000-08:00

goo

2003-12-17T09:46:00.000-08:00

Úllalalaaaaa..... þeir sem ekki hafa lesið bókina ,,Ísland og Evrópusambandið: EES, ESB eða svissnesk lausn" eru sannarlega að missa af skemmtun lífs síns. Fátt er skemmtilegra en að velta sér upp úr ákvarðanatökuferli innan ESB og hina og þessa sáttmála sem kenndir eru við hinar ýmsu borgir Evrópu og það skemmtilegasta af öllu er svo skammstafanasúpan: EES, ESB, OEEC, OECD, EFTA, GATT, ESCE, EB, EMU............. yndislegt. Alveg er það skiljanlegt að menn vilji velta sér upp úr þessu og spá í þetta á hverjum degi alla ævi. LIfi Evrópusamruninn og allar helv...stoðirnar innan þessara djö..... sambanda og samkunda!!!!! Búið á föst. kl. 16.30...

2003-12-15T06:57:00.000-08:00

Komiði sæl. Það er best að byrja aftur að taka þátt í þess bloggrugli..er þetta ekki kvennaíþrótt? Ég er eins og Ólöf Spaði algjörlega að bilast á því að geta ekki verið að vinna í íbúð, mála og borða kex með Skonrokk í botni! Það er Himnaríki þessa dagana þegar maður er að gubba úr ser innyflunum yfir lesefni ,,Íslenska stjórnkerfisins og alþjóðasamvinnu" arrrgggghhhhhh. Ég vildi að ég mætti senda hann Birgi Ármannsson í það fyrir mig, hann þyrfti ekki að lesa til að fá 10. Og hann er eilíflega þakklátur á þessari síðu, alltaf gaman að yfirgefnum heimasíðum. Öldugatan þokast örugglega í áttina að því að vera snilld, verður litfegurri með hverjum deginum. Afi Draugur var reyndar ansi lengi upp og niður stigann að henni, sveif ekki beint sem draugur þar. Hann setti bara ekkert út á neitt sem er nýtt met hjá honum. Ég á enga mynd til í tölvutæku formi af afa en þessi heitir Helgi og er alveg örugglega afi:

Annars eru seinustu vikur búnar að vera Groundhog Day, hver einasti dagur eins og sá fyrri. Mikið rosalega verður gott að komast í jólafrí, maður er bara að dreeeeepast úr leiðindum. Sæl að sinni.

2003-09-24T08:08:00.000-07:00

2003-09-22T03:22:00.000-07:00

Mikil tidindi:
Loksins bloggar Belgurinn aftur.
Belgurinn er nu ordinn loggiltur haskolanemi med gratt i vongum. Situr nu i html-kennslu.
En hverjum hefdi dottid i hug ad tad vaeru 32 ofbeldisatridi i Lilo og Stitch!!
Hvurt stefnir tessi heimur!?

2003-05-28T18:35:00.000-07:00

ó mæ goooooooood!!!!
Ég hélt nú að maður hefði séð það svart í Portúgal en samkvæmt bloggi JG og BB lestarpesta þá er Portúgal bara leyndarmálahópur á leikskólanum Marbakka miðað við það sem þeir hafa gengið í gegnum í svörtustu austur-evrópu!!! Þetta er bara Midnight express 2 að brjóstumklesstumuppviðrúðu undanskildum! Þeir sem ekki fatta tilvitnunina mega fara að sofa núna af því þeir eru plebbar. Annars öfunda ég þá samt þrátt fyrir hrakfarir enda er grasið ALLTAF grænna hinum megin!
En þetta er auðvitað ,,merkilega lífsreynsla" svipuð því að vera allt í einu sendibílsstjóri á risasendibíl sem þú mátt örugglega ekki keyra lögum samkvæmt en bossinn telur þér trú um að sé allt í lagi. Ég hoppaði aftur í þroska um ca. 10 ár í dag þar sem ég keyrði í fyrsta sinn bíl sem er örugglega 7 tonn og eigandinn sat í farþegasætinu og sagði að ,,ekki væri gott að gíra niður í svona beygju með svona farm" arrrgghhh og ég sagði ,,já einmitt" en langaði að segja ,,bíllinn minn er bara 1 tonn og ég þarf kannski aðeins að venjast svona ferlíki" eða eitthvað í þeim dúr. Ég er sendibílsstjóri! og ef lítið verður að gera verð ég ansi sleipur í púl eftir sumarið.
Annars komst ég inn í hagnýta fjölmiðlun sem er fyrsta jákvæða svarið sem ég fæ við umsókn í ca. 2 ár! Þannig að stækkandi tungl í enni mun sannarlega stækka næsta vetur! Svona:

já já það er alltaf gaman gaman. Annars fór ég til augnlæknis í morgun sem færði mér þær fregnir að sjónskekkjan hefði minnkað (!) en það er svo lítið að ekki tekur því að breyta gleraugum. Svo sagði hann mér að líklega yrði ég bæði nærsýnn og fjærsýnn svona eftir 10-15 ár sem er auðvitað mjög upplífgandi að heyra. En hei hei ef einhver er fúll og leiðinlegur þá ætti hann að taka spóluna Lylia 4-ever og þá er allra líf fullkomið í samanburði við það. Alveg skelfileg mynd og maður sannarleg skammast sín fyrir það að vera karlmaður og alls ekki mynd til að horfa á í rómantískum tilgangi!!!!

Gaman. En talandi um það að við erum öll apar og heimurinn dýragarður þá var ég á rúntinum með stórskemmtilegum manni í ,,starfsþjálfun" og svartur maður kemur gangandi eftir gangstétt. Ég hugsa ,, nú kemur rasistakomment" og viti menn ! hann segir ,,þarna kemur einn múlfatlaður". Ef einhver getur túlkað þetta þá látið mig vita. Og hér kemur smá andspyrnu-hreyfing:

sæl að sinni

2003-05-21T11:36:00.000-07:00

Jæja jæja ég var að lesa síðu Blúsbræðra og mér sýnist sem hr. Felías Fogg yrði mjög stoltur af þeim. Annars hélt ég nú að JG hefði vit á því að ferðast í bíl eftir Spánarhamfarirnar hér um árið hehe.. Það koma engar sætar stelpur inn í km radíus frá tveggjabræðratáfýlu. Ég vona að Björn sé ekki eins táfúll og JG því það væri nú bara umhverfisslys.

Fyrir þá sem ekki vita þá stefnir allt í það að ég verði sendibílsstjóri í sumar. Enn eitt starfið í pokann. Afþakkaði pent unglingatemjarastarfið hjá borginni. Þannig að nú hef ég verið skipaþjónustustrákur, háseti, handrukkari fyrir Stöð 2, fararstjóri, auglýsingastrákur, kvikmyndagerðareitthvað-strákur, flugfreyja, leiðbeinandi, símasölufífl.... ofl. Alveg augljós skref í áttina að.......

Ég læri heldur aldrei af reynslunni og lét undan þráhyggju Gunnars Þeir tveir Guðmundssonar og lék í ansi hreint XXXXX pastasósuauglýsingu og mun væntanlega flýja land um leið og þær fara að birtast. Þar leik ég stressaðan skrifstofumann sem flýtir sér mikið heim í mat til konunnar en úbbsí!! Konan kláraði allt pastað ojojoj en neeeeiiiiiii....hún dregur upp aðra krukku af pastasósu og Minn verður voða glaður hohohohohohohohooooooo... Það er deginum ljósara að ef Davíð Þeir tveir Bjarnason borgar mér ekki uppsett verð fyrir þetta um leið og auglýsingin birtist að þá fer ég með hann út í Sparisjóð Hafnarfjarðar og skipa honum að ræna hann með skrúfblýanti því annars muni ég bora gat í báðar hnéskeljarnar á honum. 10 mm.
En ég er alveg gáttaður á lélegri þáttöku í skoðanakönnuninni á unnum kjötvörum og alveg ljóst að sumir hreinlega sniðganga hana hrumpffhhh!! Viljiði nú gjöra svo vel! En staðan í dag er sú að pulsan nýtur 80% fylgis eða ,,brautargengis" en það hallar verulega á blessað bjúgað í 20 %. Látið nú alla vita af þessari merkilegu könnun á kjöthneigð Íslendinga.
Annars segi ég bara að það er óþolandi að sumt fólk geti verið að skemmta sér í útlöndum á meðan lítilmagninn húkir á Íslandi og borðar finnskar kartöflur og svínahakk úr Bónus. Buhuhuhuuuuuuuuu :(

2003-05-19T15:11:00.000-07:00

Jæja ok þá Keanu er megatöffari og ég er bara lúði!
En hér kemur afar mikilvæg skoðanakönnun:

2003-05-18T07:30:00.000-07:00

Jæjajæja, nú er ég kominn í bloggstríð við betri helminginn..... það er ýmist Jude eða Keanu (svalur vindur sem blæs yfir fjöll, gimmíabreik!)!! Ökkli eða eyra. Svalur vindur sem blæs út um boruna á mér!
Annars var Matrix Reloded bara ansi fín. Sagan er ekki eins góð og í fyrstu myndinni en hasarinn í þessarri er alveg magnaður, eitt flottasta bílaeltingaleikshraðbrautaratriði sem sést hefur og skítt með söguna bara. Versti hluti myndarinnar gerist í Zion sem er svona Stjörnustríðs/Mad Max klisjulegt og myndin hefði verið miklu betri ef sá hluti hefði verið frumlegri. Inn á milli atriða koma frumspekilegar vangaveltur og undir lokin kemur gríðarleg romsa um eðli og skilning mannsins vs. tölvunnar/vélarinnar sem ég held að enginn hafi náð alveg í bíóinu. Ég mæli með því að allir fari á myndina samt því þetta er alveg 200 % sumarmynd og varla nokkur hasar sem getur slegið þessu við. En eins og Spaðinnbenti réttilega á þá er nú kvenpeningurinn býsna föngulegur í myndinni, Monica Bellucci er hvers manns blautur draumur og konan hans Will Smith er geysigirnileg líka. Mér finnst nú Trinity ekkert sæt og skil bara ekkert í honum Neo að vera að púkka upp á þessa kerlingu. En hér koma réttu myndirnar:

Og hananú!

2003-05-15T13:06:00.000-07:00

Sælir kæru Íslendingar!
'Í tilefni af því að Óli grís giftist Dorru mússímúss hafa verið sett á lög um það að þeir sem eru ekki íþróttafréttamenn megi ekki tala eins og slíkir. Hættið nú þessarri helv.... nafnháttarsýki!!!! Óþolandi plebbalegt! Útvarpsauglýsingin sem ég hata mest af öllu er ,,HANN ER AÐ SKORA! HANN ER AÐ KOMA ÞEIM YFIR! ÉG ER EKKI AÐ TRÚA ÞESSU! ERUM VIÐ AÐ...osfrv. Þetta er viðbjóður. Og hér kemur stelpublogg: Ég var að kaupa mér voða krúttulegar sumarbuxur í Levi´s, ég er bara algjör gæji á Laugaveginum tíhíhíhí.....

Síðar, HS

2003-05-12T03:16:00.000-07:00

Jæja jæja aldeilis spennandi hlutir að gerast hérrrrrrr!!!!!!!
Nú hafa alveg 13 kosið í skoðanakönnun (óhappatala?) og niðurstöður eru þessar:
Jón Gunnar er tvífari Barry(s) unga Manilow samkvæmt 9 eða 69.23% sem eru sláandi niðurstöður! 30.77% telja hann hinsvegar sætari en Barry en eitthvað segir mér nú að mömmur og fyrrverandi kærustur séu að væmast hér. En alla vega þá getur Jón Gunnar stofnað dúettinn The Real Barry Manilows og slegið í gegn (þó ekki í Kuala Lumpur þar sem tónlist hans er talin verkfæri hins illa).
Ég tek það skýrt fram að ég hef nú snætt hádegisverð með Önnu Mörtu, ellidauða kind sem hékk á gaddavírsgirðingu í hálft ár áður en Anna Marta setti hana í pottinn og sauð hana í 145 klst og 35 mín. Ég meina common! Þið eruð að tala við manninn sem fékk sér djúpsteikt haggis með vömbinni og öllu í Edinborg!!! Ég er að spá í að opna svoleiðis stað á Lækjartorgi.

Hann gæti heitið ,,Vömbin" eða bara ,,Belgurinn".
Annars var ég að telja atkvæði í Ráðhúsinu á laugardaginn, svaka stuð. Af þeim átta tímum sem við vorum þarna þurftum við að vinna svona 2 1/2 tíma. Gerðum ekkert nema drekka kaffi, drekka kók, drekka sódavatn, borða snittur og fara á klósettið. Þá vitið þið hvernig er á ,,bakvið þessar luktu dyr" úhúhúúúúúú´........... Svo skiptumst við á fantabrögðum og handleggjauppásnúningum ég og einhver kleinuhringjalögga sem var að vinna þarna. Gaman að því. Meira seinna en fyrst þetta:

Stríðinu er s.s. lokið, auðvitað er JG sætari en Barry, erekkílagimeðykkur!!

2003-05-09T03:44:00.000-07:00

2003-05-07T11:57:00.000-07:00

Guten Tag alle Leute
Ég verð að leiðrétta seinasta blogg vegna misskilnings, þetta var ekki mynd af Jóni Gunnari heldur nefapa. Hins vegar tókst mér að ljúga að blessaðri xxxxxx (ritskoðað) að JG hefði farið í nefaðgerð eftir margra ára komplexa og að hann samsvaraði sér mun betur nú en áður. Það er ljótt að ljúga og því verð ég að segja sannleikann, JG fór í lípósöksjon og hér er myndin sem hann sendi mér:

Annars vil ég þakka öllum 10 sem ég þekkti og mættu á opnunina á laugardaginn. Sumir voru löglega afsakaðir en aðrir.... kannski át einhver hjá póstinum boðskortin eða þau fóru ekki út á réttum tíma. Ef ekki þá er ég bara alveg hættur að bjóða helv.. XXXXXXXXXXXXXXXXXXXXXXXXXXXXXXX og XXXXXXXXXXX (ritskoðað). Ég meina maður getur hellt í sig bjór þó að verkin séu vitleysa og haugamatur. Mér tókst þó að selja 2 stk. sem hlýtur að vera gott miðað við höfðatölu. Annars hefur kaupmátturinn engin áhrif á myndlistarkaup. Ég fer svo að telja atkvæði á laugardaginn þannig að ef það kemur í fréttum að talningin hafi verið ógild í Ráðhúsinu þá vitið þið hverjum það er að kenna.. þetta verður svona ,,þessi er D nei ég meina hmm S eða U þetta er svo illa krossað sko"
Vonandi idiot-proof þar sem ég er nú idiot. En annars ....bless.

2003-04-27T14:43:00.000-07:00

Komiði sæl.
Nú er puttinn að verða góður loksins þannig að ég geti bæði gefið ljótum og heimskum ökumönnum hann (langatöng vinstri handar) sem og lamið fólk. Hann fór úr lið eins og flestir muna sem þekkja mig, hetjuleg íþróttameiðsl að sjálfsögðu.
Ég má til með að óska Jóni Gunnari til hamingju með vel heppnaða lýtaaðgerð. Hérna er mynd sem hann sendi mér nýkominn heim af spítalanum:

Hér er hann nú reyndar kominn á 49. bjór og kátur eftir því.
En fyrir þá sem ekki vita að þá verður opnuð ákaflega furðuleg sýning í Íslenskri grafík næsta laugardag (3.) Ég reikna með því að spreða í öl handa fólki, var jafnvel að hugsa um að hafa kaffi og suðusúkkulaði frekar en það er dálítið elliheimilislegt þannig að ég held að ölið blívi... Annars mæli ég með því að allir sem áhuga hafa á myndlistarumræðu ( 0.0 manns) lesi grein Halldórs ,,Posa" Runólfssonar í Mogga dagsins í dag. Afar flott rýtingsstunga í magann á Hannesi Lárussyni, svona ,,túsjei" eins og maður segir í skylmingum. Ég held að enginn lesi hana nú samt þó ég hvetji til. Framhald seinna...............

2003-04-25T10:19:00.000-07:00

Komiði nú enn og aftur margblessuð og sæl og megi sólin baka á ykkur rassinn í sumar. Munið að nota sólarvörn annars gætuð þið fengið svona:

Þetta er ótrúlegt en satt melanomaeða sortuæxli eins og það heitir á íslensku. Nú eru allir búnir að æla sem á síðunni eru og það er nú líka megrandi og gott fyrir bikínímátun. Annars er nú betra að hafa örvandi sumarmynd:

MMmmm konur í sumarkjólum, ekkert er nú fallegra en það. Þetta er belgur dagsins by the way. Svo er líka mjög sumarlegt að sjá fulla dimiteringa út um allan bæ. Besti búningurinn var Braveheart, mikil snilld!! Annars óttast ég hvað menn gera með þessu stóru sverðum, spurning hvort saklaus kaupmaður á Laugavegi verði klofinn í herðar niður í þetta sinn. Jón Kúndus er eitthvað að misskilja mig þessa dagana, ég skil fullkomlega Nigelluhneigðina hans og vildi bara að hún væri allsber í þáttunum. Í sárabætur færi ég honum þennan glaðning:

En nú verð ég að yfirgefa Borgarbókasafnið. Það eru litlar gelgju allt í kring sem eru svo slæmar að maður missir trúna á mannkynið.
Au revoir.

2003-04-16T06:49:00.000-07:00

Komiðisæl ef einhver eruð.
Hér er ég loks að blogga í boði Borgarbókasafns Rvk. með rugluð mæðgin mér við hlið sem tala mjög hátt. Þau væru ,,belgir dagsins" ef það væri til mynd af þeim á netinu.
Hér er einn belgur sem hefur fengið sér nokkra Bragðarefi

Annars hef ég ekkert að blogga um, það er allt svo drephundleiðinlegt. Allt sem er gott í lífinu er dýrt, óhollt eða ólöglegt (næstum því allt). Allt of margir fávitar í umferðinni og allt of margir fávitar bara út um allt. Plebbalegt ljósabrúnkufólk, fituhlunkar með mullet-klippingu sem éta bara McDonalds, gamalt fólk með ökuréttindi fram á grafarbakkann, hálffimmtugar snyrtidömur sem eru ennþá með unglingatalgalla (tískuafleidd smámælgi) í morgunsjónvarpi, pólitíkusar sem láta breyta sér í trúða í beinni útsendingu, fullorðið fólk sem kann ekki að fara í beina röð. Málsháttur dagsins í tilefni páska: Fegurðin er á yfirborðinu en ljótleikinn inn við beinið. Er hann ekki flottur?
Í seinustu viku skrifaði e-r blaðamaður frétt um málverkafölsunarmálið ógurlega og var að gera grín að orðavali og orðaforða listfræðinganna sem gáfu sérfræðiálit. Mér fannst það nú ekkert sérstaklega torskilið. Það sem er hins vegar torskilið er vínsmakkaramál!!! Ég var að horfa/hlusta á Ísland í bítið í morgun. Þeir djúsa yfirleitt einu sinni í viku, fá vínsmakkara til sín með helling af búsi. Dæmi um lýsingarnar í morgun:

,,...finnið hvernig það lyktar af púðri, svona eins og þegar þú opnar snyrtitösku konu og finnur lyktina af farða og púðri.."
,,...kemur svona eins og högg í andlitið upp úr glasinu..."
,,...þarna er vín sem er á tíma, er mikið í munni og svört ber yfirgnæfandi, blandað af bæði franskri og amerískri eik sem gefur víninu nýja vídd, hefur líf í munni og er krefjandi, en er mjúkt í enda, þar sem viðar og vanillu keimur koma vel fram, vínið hefur langa endingu..."
,,....vínið gefur ágæta angan af tóbaki og súkkulaði, einnig leður í enda..."

Það besta við þessar vínkynningar er þykjustuleikurinn hjá stjórnendunum sem láta líta út fyrir að þeir finni þetta allt saman eins og gaurinn. Ég bara spyr (ef einhver er að lesa þetta): Hefur þú einhvern tíma fundið púður- eða leðurlykt af rauðvíninu þínu eða angan af tóbaki! Mig langar ekki í rauðvín með tóbakslykt.
Ég er ekki hættur að skíta á Stöð 2. Auglýsingastofan þeirra fékk þá frábæru hugmynd að hafa þemakvöld: Stelpustöð, Spennustöð osfrv. Ég skil samt ekki af hverju matreiðsluþættirnir hans Sigga Hall eru fyrir stelpur. Bo Hall: ,,Ferðumst með hinum eeeeldhressa Sigga Hall til Próvaansss í Frakklandi og blablabla....Stöð tvö er stelpustöð í kvöld". Kannski er Siggi Hall svona kerlingarlegur, hann er alla vega enginn Jamie Oliver sem allar stelpur eru að tapa sér yfir. Svo eru strákar líka miklu betri kokkar en stelpur......
Siggi Hall er náttúrulega eldhress og sífullur eins og menn eiga að vera þegar þeir eru í svona djobbi en það bráðvantar svona unga og sæta, "naked chef" stelpu. Hér er mynd handa þeim sem eru með ,,Nigellu-hneigð" (þekki a.m.k. einn mann sem þjáist af slíku):

Hún er nú ansi sæt...........
Síðar.

2003-03-31T01:52:00.000-08:00

Verð að skella inn smá link. Ragnheiður vinkona Ólafar á snilldartakta á bloggsíðu sinni og tekst með tilþrifum að lýsa hinum íslenska plebba/ plebbus islandicus með mikilli nákvæmni. Síðan er hér.
Því miður held ég að þessi lýsing eigi við mjög stóran hluta þjóðarinnar, Ragnheiður okkar :(

2003-03-27T05:28:00.000-08:00

Meira nördalegt í blogginu, þar sem blogg er jú nördasport fyrir kyrrsetufólk
Hvað þarf maður að teygja vel og æfa lengi til að geta þetta?

úff, eins gott að rifni ekki allt í sundur og stellið detti af. Nú þrengist hringurinn kringum þá ráðherra sem ekki hafa drukkið ógeðsdrykk, sá Sif badmintonbeibsu drekka einn slíkan í Íslandi í bítið. Ég er svo mikill plebbi að ég væri alveg til í að sjá Dabba og Halldór drekka einhvern viðbjóð. Held að það sé alveg útilokað nema Davíð fái ,,drottningar-viðbjóðsdrykk".
En Belgur dagsins er dadarradaaaaa:

Gaui er feitur, hann er belgur. Flott framtak hjá honum samt og helv.. góður matur. En mér finnst samt að hann ætti að vera grannur því þó hann hafi létt sig gríðarlega þá kláraði hann ekki dæmið. Af hverju kemur hann sér ekki í kjörþyngd fyrst hann er svona mikill gúrú? Af því hann svindlar og fær sér hamborgara.
Talandi um hamborgara þá er kominn nýr McDonalds sem er alveg hitaeiningalaus og beinlínis hollur:

Bið afsökunar á dónaskapnum, lofa að gera þetta ekki aftur.

2003-02-28T04:27:00.000-08:00

sæll öll.
Þetta er mynd af afa mínum.....nei, afsakid, þetta er Funakoshi, guðfadir karatesins. Tad er mynd af honum í karatesalnum minum tar sem klukkan hekk adur, nú veit madur ekki hversu mikid er eftir af tímanum. Klukkan er Funakoshi allan tímann. Nördalegt? Ja........ en hver er ekki nörd inn við beinid?
En hétu litlu loddýrin sem töludu ekki funakoshi? Eða var þad yamagochí? ekki viss....
Talandi um karate þá er Chuck Norris ótrúlega svalur, sjáidi bara:

Vá ég vildi ad ég vaeri svona svalur!!!!
Fórum á Vetrarhátíð í gær og sáum ósýnilega gjörninginn hjá Rannveigu og Evu hehehe sorrí R og E....! En hann var samt rooosalega artífartí og ljóðrænn en eins og Ólöf og vinkonur hennar básúnuðu frá tjarnarbrúnni svo allir í 300 metra radíus heyrðu til Sigurvegarar kvöldsins voru The Cleaning Women í ráðhúsinu. Finnskt karlatríó sem klæðir sig eins og konur og spilar á rafmagnaðar þvottagrindur! Það er sko kúl!!
er annars einhver að lesa þetta? Veit ekki.. Eitt í viðbót: Það þýðir ekkert að setja á sig Sigurrósarhúfu og ganga með skilti sem stendur á Landinu blæðir! Það er búið að ákveða þetta, en það sem mér finnst merkilegast er þessi bjánalega landslagsrómantík í fólki. Fer það oft þangað? Hefur það komið á svæðið? Eru ekki 100 önnur alveg eins svæði á landinu? Mér finnst að ef fólk ætlar að mótmæla þá eigi það að vera á ,,hagfræðilegum" nótum, skilti sem stendur á: ,,Frikka Sóf er alveg sama þó hann sturti milljörðum í klósettið sitt" eða eitthvað í þeim dúr. Það er auðvitað grunnurinn að efanum, á þetta eftir að skila sér til baka eða fer allt til fjandans? Og ég tek undir með konunni litlu: Netundirskriftir eru letimótmæli og gagnslausar. Lifi byltingin...
Að lokum, mynd af bassaleikara Hreingerningarkerlinganna:

2003-02-27T05:25:00.000-08:00

Sæl aftur.
Eins og sjá má af nýjustu myndinni af belgi þá líkjast gæludýr ekki alltaf eigendum sínum.
Seinustu helgi opnuðum við Dóri og Hrappur sýninguna ,,Það sem þú vilt sjá". Mættu um 70 vinirvandamenn og var þetta bara ágætis opnun þó að fólk hafi ekkert botnað í neinu að ég held. Við þökkum þeim er settu rauða punkta á Morgan Kane myndir. Frá opnun hefur varla kjaftur litið inn.
Samkvæmt könnun Fréttablaðsins fer helmingur þjóðarinnar aldrei á listasafn, um 40% 1-2svar á ári og þessi 10% sem eftir eru voru aðeins duglegri. Spurning hvort menn hætti þessu tali um hvort málverkið sé dautt og snúi sér að spurningunni er myndlistin dauð? Kannski drapst hún um leið og sjónvarpið kom, myndlistarmenn eru þeir einu sem hafa ekki áttað sig á því. Og þó, eitthvað segir mér nú að aðsókn og áhugi sé meiri í ýmsum öðrum löndum.
Við félagarnir álítum að fólk geti svarað því hvað sé flott kona og flottur bíll en alls ekki hvað sé flott myndlist. Það er kannski gott og kosturinn við myndlist að hún er svo fjölbreytt að það er ómögulegt að svara því og enginn einn sannleikur. Heví sjitt blogg hér.
Annars eru menn að eyða peningum, tíma og orku í galleríum bæjarins fyrir ekki neitt. Líklega flestar sýningar í stóru tapi. Myndlistarmenn eru líka einu listamennirnir sem eru að gefa vinnu sína í afþreyingartilliti. Það kostar ekkert inn á sýningar.
Gaman að velta því fyrir sér en í beinu framhaldi: allir velkomnir á næstu sýningu :)
Bless á meðan, HS

2003-02-27T05:04:00.000-08:00

2003-02-15T15:52:00.000-08:00

Alltaf gaman að lesa bullið hjá Ólöfu

2003-02-14T03:31:00.000-08:00

Nú skal bloggað þar sem dagurinn gefur ærið tilefni til þess. Voðalega margir halda að Valentínusardagurinn sé í dag. Mynd í takt við það:

Við Íslendingar erum upp til hópa Kanasleikjur. Það sannar sig best í dag, prófið að hlusta á útvarpið. Endalausar V-dags auglýsingar með bandarískum blóma-konfektsklisjum. Í fyrsta lagi þá er enginn V-dagur í íslenskri menningu, við erum með konudag, bóndadag, sprengidag, öskudag, sumardaginn fyrsta og blablabla....Við þurfum alls ekki að taka upp ógeðslega hallærislega og væmna, bandaríska ,,helgidaga". Svanirnir hér að ofan eru uppstoppaðir.

Talandi um Kanasleikjur þá getum við skoðað afþreyingarmenninguna hérna, málfar fólks osfrv. Við ,,tökum" sturtu og auglýsum ,,okkar ómótstæðilegu" hitt og þetta og ´myndir sem eru ,,nú í bíó" og erum að breytast í hamborgararassafólk. Stórt er fallegt.

Og það er ekki bara V-dagur heldur "Halloween" sem er verið að reyna að klína á okkur. Hvernig væri það að taka upp indverska helgidaga eða múslimska? Búum til svona túrban-dag, þá setja allir upp vefjarhött og borða kebab allan daginn. Það væri a.m.k. frumlegt. Valentínusardagurinn er kaþólskur dagur. Heilagur Valentínus dó held ég fyrir ástina. Vonandi var hann í hreinum nærbuxum. Mér finnst líka sjónvarpsþættir vera að ,,Oprah-st", allt orðið svona sjálfgefið blaður. ,,Hvað á konan að gera ef hún heldur að maðurinn hennar sé að missa áhugann á henni"? ,,Hvað þarf ég að segja konunni minni oft í viku að ég elski hana"? Alltaf sama kjaftæðið.

Ég hvet alla til þess að hunsa þessa Valentínusarvitleysu og kaupa alls ekki blóm og konfekt í dag. Þá segja kannski margir sárhneykslaðir:,,Hvah, þú ert bara ekkert rómantískur!" Fólk veit ekkert hvað rómantík er. Heimskingjarnir í Djúpu lauginni svara alltaf ,,æ bara svona keeertaljóós og rólega tónlist og freyðibaaað". Rómantík er eitthvað hugtak sem hver og einn túlkar á sinn hátt.

Ég skal reyna að láta mér detta rómantíska stund í hug: ummm...við Ólöf fórum og skoðuðum Versali hér um árið sem er risastórt barrokkklósett. Það er pissulykt í öllum herbergjum þar, alveg satt. Við flúðum þaðan út, keyptum okkur flösku af freyðivíni og einhverja osta og stútuðum því í hvelli við lítið stöðuvatn nálægt Versölum, í sólskini og góðum fíling. Fórum svo flissandi eins og smástelpur og vel ,,tipsí" í lestina aftur til Parísar. Það er rómantískt! Af því að þetta er minning sem vekur með okkur hlýjar tilfinningar af því við nutum stundarinnar saman. Er þetta vitleysa hjá mér? Annars veit ég ekkert hvað rómantík er og fullyrði enn og aftur að ég veit ekkert hvað daður er, hvenær ég daðra eða hvenær einhver daðrar við mig (gamlar rökræður).

Sverrir Stormsker kom með ágæta hugmynd: Karlmenn, gefið konunum tíma hjá tannlækni. Það er sönn umhyggja. Elska ykkur öll.........

2003-01-31T04:26:00.000-08:00

Komiði sæl.
Ég biðst forláts á óskipulögðum skrifum en sumir hafa bara eitthvað þarfara að gera en að skrifa vitleysu á síðu sem í mesta lagi 3 lesa.
Þessi mynd er af ágætis síðu sem heitir cruelcard.comen frá henni geturðu sent hatursfull og andstyggileg kort til þeirra sem þér er illa við.
Þetta er gott framtak á þessum ógnartímum væmni og mússímússí viðbjóðs hvers konar. Hvet sem flesta til þess að senda skíthælum svona kort.
Þar sem blogg er kerlingarlegasta uppfinning nýrrar aldar þá ætla ég að vera kerling og segja ykkur hvað þið eigið að elda í kvöldmat. Nú vita allir að líkamsdýrkun er trú nútímans og einkaþjálfarar guðumlíkar trúboðsverur sem færa þig nær guðdómnum. Mikilvægur þáttur í því að komast til þess himnaríkis er að borða kjúkling.
Þú ferð til helvítis ef þú borðar ekki kjúkling og ferð líka til helvítis ef þú færð þér djúpsteiktar rækjur. Nú jæja, uppskriftin (sem ég samdi í gær).

Þú tekur 1 stk. hálshöggvinn, fyrrverandi búrkvalinn og niðurlægðan kjúkling og niðurlægir hann enn frekar með því að baða hann í ólífuolíu á ofnskúffu.
Þú fleygir yfir hann salti, pipar, steinselju og marjoram og rassskellir hann áður en þú stingur honum í 225 stiga hita í ofni.
Þú lætur hann þjást þar í ca. hálftíma, lækkar hitann í 200 og snýrð honum við.
Þú skerð ógnarstóran lauk í óreglulega ferninga, trapisur og þríhyrninga. Þú skerð eina sterapapriku frá Steralandi í ræmur, 3 kartöflur í trapisur, kúrbít í sívalninga.
Þetta steikirðu allt þar til litarhafti Ingólfs Guðbrandssonar er náð í vel í stórum potti. Þá skvettirðu hálfum lítra af vatni yfir það og hendir kjúklingateningi út í og svona hálfri til heillri dós af tómatsósu (hunts) og blandar öllu saman. Salt og pipar. Síðan læturðu þetta malla á miðlungshita þar til þetta er orðið að nokkuð þykkri sósu.
Þegar kjúklingurinn lítur út eins og Ingólfur við sundlaugarbakkann á frönsku sundskýlunni þá kippirðu honum út og misþyrmir honum allferlega með stórum hníf og rífur af honum allt hold þar til grindin ein stendur eftir. Jarðaðu beinagrindina í ruslinu og hentu kjötinu út í pottinn með sósunni og blandaðu öllu saman í svona 10 mín.
Étist með áfergju og sóðaskap með ísköldu Soda stream.

Fróðleiksmoli dagsins:
Svo virðist sem mannssaur verði nánast svartur á lit ef maður er á stífum pensillín-kúr. Mun það vera vegna þess að bakteríuflórunni er útrýmt í þörmunum á meðan á kúrnum stendur og því mikilvægt að borða AB mjólk til að viðhalda bakteríuflórunni.
Skrifa að vörmu spori. Veriði sæl.

2003-01-26T06:45:00.000-08:00

Ég bið alla aðdáendur síðunnar innilegrar afsökunar á því að hafa ekki sinnt þeim undanfarna daga. Ég hef legið flatur eftir misþyrmingar Þórarins tannlæknis undanfarna daga, endajaxl sem lá á hlið og ég lá í tannlæknastól í einn og hálfan tíma meðan blóðið sprautaðist í allar áttir og tannsi kom með setningar eins og ,,nei, andskotinn, ég verð að kljúfa hann" og ,,ahh, heldurðu að önnur rótin hafi ekki orðið eftir!" og ,,við verðum að fara varlega þar sem rótin liggur ofan á taug". Ég undirbjó mig mjög vel andlega fyrir ógnarsársauka en slapp við hann þar til heim kom. Þetta er ákaflega óþægilegt allt saman, helmingur spegilmyndar minnar er eins og Guðfaðirinn, skemmtileg tilviljun að aðallag myndaflokksins er einmitt gemsahringingin mín. Svona lít ég út í dag:

2003-01-15T05:27:00.000-08:00

Það er ekkert grín að leita að þessu myndefni á netinu skal ég segja ykkur. Virðist vera að einhver atómbomba hafi verið skýrð Fat Man(?!) mjög skrýtið. Svo er Houston feitasta borgin í USA og þá væntanlega í heiminum. Þið skulið ekki fara þangað ef þið vorkennið offitusjúklingum (hver gerir það ekki annars?) En svo er þetta vandamál í Kína líka, maður hélt í heimsku sinni að Kínverjar væru litlar mjónur.

2003-01-15T05:14:00.000-08:00

Ég fann þessa mynd á netinu þegar ég var að leita að ,,belgi dagsins" og ef þetta er ekki eitthvað sjúkt grín þá er þetta afar óhuggulegt á fleiri en eina vegu! Ég tek það fram að þetta á alls ekki að vera fyndið heldur dæmi um viðbjóðinn sem maður finnur á netinu.

2003-01-14T04:31:00.000-08:00

Nýjustu fréttir: Ekki neinar fréttir. Elduðum gráðaostssvínhund á laugardaginn sem var svínslega góður og Jón Gunnar fyrrverandi feitabolla kom í mat til okkar Ólafar og skvetti rauðvíni út um allt þó hann væri algjörlega allsgáður. Meiri rauðvínsbelgurinn, ef hann væri dvergur þá myndi ég kasta honum! Fórum svo og máluðum hvítu strigaskóna mína svarta á dansgólfi 22ja.
Þann 23. febrúar opnar tímamótasýning í galleríi Skugga á Hverfisgötu sem enginn má missa af. Hún er algjört leyndó þangað til.
Talandi um bíómyndir einu sinni enn: Gangs of New York, Scorsese-myndin er góð en ekki frábær. "Visual masterpiece" er ábyggilega vinsæl lýsing á henni. Daniel Day-Lewis er mjög huggulegur vondikall sem allir verða að sjá.
Orð dagsins er endajaxlataka. Það er mjög skemmtilegt að fara í eina slíka, sprengja varir, sprauta með stórri nál í tannhold og láta hamast með töng á tönninni og heyra hvernig brakar í öllum hausnum. Svo kemur svo skemmtilegt gat í munninn sem maður getur safnað alls konar mat í. Gott ef mann langar í snakk en allt búið á heimilinu þá ,,hei, kannski er snakk í endajaxlsholunni minni"! Fleira er ekki í fréttum að sinni.

2003-01-14T04:19:00.000-08:00

Þetta er belgur vikunnar, einhver Karen í útlöndum með stóran belg

2003-01-06T09:09:00.000-08:00

Orð dagsins er: HOR
Ef einhvern vantar kíló af hori getur hann komið til mín. Ég hef verið að snýta mér síðan í byrjun nóvember og ekkert lát virðist á horframleiðni í mínum hausi.
Talandi um viðbjóð þá eru kínverskir myndlistarmenn sumir dálítið viðbjóðslegir. Las í Mogganum um einn sem nartaði í andvana fætt barn. Maðurinn fær auðvitað mikla athygli og sjálfsagt er þetta hápólitísk gagnrýni en menn geta nú farið aðrar leiðir. Ég lofa ykkur því að ég muni aldrei halda sýningu sem inniheldur saur, rotið hold osfrv.

Bók dagsins: ÁFORM e. Michel Houllebeq eða Mikjál Ullabjakk fyrir þá sem eru slappir í frönskum framburði. Bók sem maður límist fastur við, full af ,,áleitnum spurningum" um kynferðislegt velsæmi, klámvæðingu ( Kolbrún Vinstrigræna hlýtur að hafa lesið hana) og siðferði vesturlandabúa ossovidere. Góð bók fyrir þá sem þola ekki bækur þar sem mörgum blaðsíðum er eytt í að lýsa ákveðinni lykt eða ákveðnu bragði.

Spóla dagsins: Donnie Darko. Það eru allir að slefa yfir þessarri mynd og mér fannst hún helvíti góð bara.
Ekki-spóla dagsins: Kannski ekki komin á spólu (?) en Road to perdition er bara hundleiðinleg rjómaterta. Svona terta sem lítur vel út en er svo ekkert nema gervirjómi og einhverskonar svampur að innan. Hefði bara átt að vera teiknimynd því þetta er víst gert eftir teiknimyndasögu.

2003-01-06T08:55:00.000-08:00

Svona lít ég út eftir jólahátíðina, búinn að maka á mig skóáburði.

2003-01-03T05:56:00.000-08:00

Komiði sæl!
Hér er belgur dagsins.